یکشنبه، 23 ذوالقعده 1447 / 20 ثور 1405

کنفرانس تواصل تجارتی و نشست‌های تجاری با حضور محترم مولوی شهاب‌الدین ثاقب، معین امور مالی و اداری وزارت صنعت و تجارت امارت اسلامی افغانستان و آقای امان‌بای اورین‌بایوف، رئیس مجلس عالی جمهوری قاره‌قلپاقستان اوزبیکستان و اعضای سکتورخصوصی ولایت بلخ افغانستان و این جمهوری برگزار گردید.

محترم مولوی شهاب‌الدین ثاقب، معین امور مالی و اداری این وزارت به سفرهای مقامات جمهوری اوزبیکستان به افغانستان و سفرهای مقامات افغانستان به آن کشور اشاره کرده، این سفرها را بیانگر تعاملات سازنده و گسترش همکاری‌های اقتصادی میان دوطرف عنوان نمود.

معین امور مالی و اداری وزارت صنعت و تجارت با شمردن ظرفیت‌های ولایت بلخ در امر جلب و جذب سرمایه‌گذاری در سکتورهای مختلف و پیشرفت‌های صورت گرفته در جمهوری قاره‌قلپاقستان اوزبیکستان، دو جغرافیا را مکمل یکدیگر در عرصه فعالیت‌های اقتصادی و تجارتی دانسته، گفت: در جریان سفرهای والیان جمهوری اوزبیکستان به افغانستان تفاهمات زیادی به ارزش میلیون‌های دالر میان سکتورخصوصی دوکشور به امضا رسید و سطح دادوستد دوکشور نیز افزایش یافته است.

آقای مولوی ثاقب نقش سکتورخصوصی افغانستان و اوزبیکستان را در توسعه و گسترش روابط اقتصادی و تجارتی دوکشور مهم ارزیابی کرد.

در نتیجه برگزاری نشست‌های تجاری میان اعضای سکتورخصوصی ولایت بلخ افغانستان و اعضای سکتورخصوصی جمهوری قاره‌قلپاقستان اوزبیکستان به تعداد 10تفاهم و به ارزش 112میلیون دالر به امضا رسید.

قابل ذکر است که نمایشگاه محصولات و تولیدات جمهوری اوزبیکستان از سوی محترم مولوی شهاب‌الدین ثاقب، معین وزارت صنعت و تجارت امارت اسلامی افغانستان و آقای امان‌بای اورین‌بایوف، رئیس مجلس عالی جمهوری قاره‌قلپاقستان اوزبیکستان در شهر مزارشریف افتتاح گردید.