دعامې روغتیا وزارت له سرپرست سره دصنعت او سوداګرۍ وزیر لیدنه
سهشنبه: دغبرګولي ۱۱مه ۱۴۰۰
دافغانستان داسلامي جمهوریت دصنعت او سوداګرۍ وزیر ښاغلي نثار احمد غوریاني دعامې روغتیا وزارت له سرپرست ښاغلي ډاکټر وحید مجروح سره دخپل کار په دفتر کې وکتل او په دغه کتنه کې یې دکرونا ویروس ددریمې څپې په وړاندې دمبارزې په څرنګوالي بحث وکړ.
په دې غونډه کې ، د صنعت او سوداګرۍ وزیرښاغلي نثار احمد غوریاني وویل چې وزارت او خصوصي سکتور چمتو دی ترڅو د عامې روغتیا له وزارت سره په هیواد کې د کورونا ویروس د دریمې څپې په وړاندې مبارزه کې همکاري وکړي.
ښاغلي غوریاني همدارنګه زیاته کړه چې ده دسوداګریزو خونو او بیلابیلو سکتورونو له استازو، فدراسیونونو له مسولینو ، په ځانګړي ډول د اکسیجن ، روغتیا ساتنې ، برخې له صنعتکارانو سره خبرې کړي او د عامې روغتیا له وزارت سره یې دهمکارۍ په څرنګوالي ورسره بحث شوی.
دعامې روغتیا وزارت سرپرست ډاکټر وحید مجروح په هیواد کې د کورونا ویروس د دریمې څپې په وړاندې مبارزه کې د صنعت او سوداګرۍ وزارت له چمتووالي څخه مننه وکړه او زیاته یې کړه چې له دې ویروس سره مبارزه همکارۍ ته اړتیا لري او پکار ده چې دولتي نهادونه ، خصوصي سکتور اودهېواد ټول اتباع یې په وړاندې مبارزې ته مټې راونغاړي
د غونډې په پای کې ، دواړو لورو د کرونا ویروس د دریمې څپې پروړاندې په مبارزه کې د صنعت او سوداګرۍ وزارت ، د عامې روغتیا وزارت او خصوصي سکتور ترمنځ پر ګډې همکارۍ ټینګار وکړ.
