د افغانستان او ترکیې ترمینځ اقتصادي او سوداګریزې ارتباطي او تخنیکې کمیټې جوړېږي
پنجشنبه ۲۶ جمادی الاول ۱۴۴۶ / ۸ لینډی ۱۴۰۳
د افغانستان د اسلامي امارت دصنعت اوسوداګرۍ وزارت سرپرست محترم الحاج نورالدین عزیزي ترکیې هېوادته دخپل سفرپه دوام او دحلال استانبول ۲۰۲۴ د نړیوال نندارتون په پرانیست غونډه کې تر ګډون وروسته، ددې نندارتون په څنډه کې د ترکیې جمهوریت د سوداګرۍ له وزیر محترم عمر بولات سره ولیدل.
پدې لیدنه کې د افغانستان اسلامي امارت دصنعت او سوداګرۍ وزارت سرپرست دغه نندارتون ته د افغان پلاوي له بلل کېدو مننه وکړه چې په مقابل کې یې د ترکیې جمهوریت د سوداګرۍ وزیر، د الحاج عزیزی په مشرۍ د افغانستان د اسلامي امارت پلاوي ته د هرکلي ویلو ترڅنګ د دواړو هېوادو ترمینځ لازیاتې همکارۍ ته هیله مندي ښکاره کړه.
همدارنګه دواړو لوریو د یوه اوبل هېواد ته د سوداګریزو پلاویو( دولتي او خصوصي سکتور) سفر د دواړو هېوادو ترمینځ د سوداګرۍ د پراخوالي لپاره اساس او مقدمه وګڼله.
په پای کې دواړو لوریو پر دوه اړخیزه لیدوکتو او د نندارتونو پر جوړیدو په ټینګار سره پریکړه وکړه چې دواړه لوري به یوه تخنیکي او ارتباطي کمیټه جوړوي او دغه کمیټه به دنده لري ترڅو ستونزې،خنډونه او فرصتونه تشخیص او د حل مناسبې لارې ورته ولټوي.
