د افغان مهاجرینو په وړاندې د شته ننګونو د لیري کولو او له پاکستان سره د سوداګریزو او ترانزیتي اړیکو د ښه والي لپاره هڅې
پنجشنبه 19 شوال المکرم 1446 / 28 حمل 1404
د افغانستان د اسلامي امارت د صنعت او سوداګرۍ وزارت سرپرست محترم الحاج نورالدین عزیزي او پاکستان ته په تللي پلاوي کې د مهاجرینو او بېرته را ستنیدونکو چارو وزارت استازي، په اسلام آباد کې د پاکستان د بهرنیو چارو له وزیر محترم محمد اسحاق داړ سره لیدنه وکړه او پر سوداګریزو او ترانزیتي مسایلو سربېره یې په پاکستان کې د افغان کډوالو د وضعیت په اړه ورسره خبرې وکړې.
پدې دوه اړخیزه ناسته کې د افغانستان د اسلامي امارت پلاوي په پاکستان کې د مېشته افغان کډوالو د ژوند شرایطو د ښه والي لپاره یو شمېر وړاندیزونه وکړل چې د مناسب وخت تر را رسیدو پورې د مهاجرینو د جبري ویستلو څخه مخنیوی، د پاکستان پولیسو له خوا د افغان مهاجرینو د په خپل سر نیولو او ځورولو مخنیوی، د هغه هېواد په تعلیمي ادارو کې په زده کړه د بوختو افغان مهاجرینو له ایستلو مخنیوی، د افغان کډوالو د مالونو او شتمنیو د لېږد لپاره دلازمو آسانتیاوو برابرول او صحي او روغتیایي خدمتونو ته د افغان کډوالو له خنډ او ځنډ پرته لاسرسی، پکې شامل و.
د یادونې وړ ده چې د پاکستان د بهرنیو چارو له وزیر سره دا ناسته په پاکستان کې د مېشته افغان کډوالو په وړاندې دشته ګواښونو د لیري کولو او د دواړو هېوادو تر مینځ د سوداګریزو او ترانزیتي اړیکو د ښه والي د هڅو په چوکاټ کې ترسره شوې وه.
