د بي بي خدیجې کبرا (رض) د نندارتون د متشبثو ښځو لویه لاسته راوړنه ده
یک شنبه مورخ 5 جمادی الاول 1445 / 2۸ لړم 1402
د صنعت او سوداګرۍ وزارت سرپرست ښاغلي نورالدین عزیزي د بي بي خدیجې کبرا رض له ملي او نړیوال نندارتون څخه لیدنه وکړه.
ښاغلي عزیزي دغه نندارتون د شرعي احکامو په رعایت کولو سره د مېرمنو د تشویق په برخه کې یوه ستره لاسته راوړنه وبلله.
د صنعت او سوداګرۍ وزارت سرپرست د ښځو ځانګړی نندارتون مهم وباله او زیاته یې کړه؛ د دا ډول نندارتونونو جوړول په هیواد کې د میشتو کورنیو د اقتصاد په وده کې اغېزمن رول لري.
همدارنګه د افغانستان د ښځو د سوداګرۍ او صنایعو خونې مشرې آغلې سلما یوسفزۍ د دغه نندارتون د امنیت د تامین او د ښځو لپاره د خوندي چاپېریال په رامنځته کولو کې د صنعت او سوداګرۍ وزارت او د هېواد له امنیتي سکتور څخه مننه وکړه.
د یادولو وړ ده چې په دغه نندارتون کې څه باندې ۸۰۰ غرفو کې د هیواد د متشبثو میرمنو تولیدات نندارې ته ایښودل شوي دي چې د دوشنبې د جمادي الاول د میاشتې تر ۷ مې (عقرب۲۹) نیټې پورې به دوام لری.
