د صنعت او سوداګرۍ وزارت د مشرتابه مقام: د هېواد صنعت تخنیکي او مسلکي کدرونو ته اړتیا لري

چهارشنبه ۱۸ جمادی الاول ۱۴۴۶ / ۳۰ لړم ۱۴۰۳

د صنعت او سوداګرۍ وزارت سرپرست محترم الحاج نورالدین عزیزي د ا.ا.ا. د ریاست الوزرا د اداري مرستیال محترم مولوی عبدالسلام حنفي، د اقتصاد وزارت سرپرست محترم قاری دین‌محمد حنیف، د اوبو او انرژۍ وزارت د سلاکار محترم داکتر فاروق اعظم،د تخنیکي او مسلکي زده کړو ادارې رییس محترم مولوی غلام‌حیدر شهامت او نورو دولتي مقاماتو سره د هغه دوهم نندارتون په پرانیست غونډه کې ګډون وکړ چې د افغانستان د پیاوړو ملي ابتکاراتو او نویوتوبونو تر نامه لاندې د تخنیکي او مسلکي تعلیماتو ادارې له خوا جوړ شوی و.

پدې پروګرام کې د صنعت او سوداګرۍ وزارت سرپرست پدې ټکي پر ټینګار سره چې هڅه باید وشي تر څو په ټولو سکتورونو کې پر ځان بسیاینې ته ورسېږو، وویل: د هېواد صنعت نن تخنیکي او مسلکي کدرونو ته اړتیا لري او دا ځوانان به د مجاهدینو په څېر د فن او تکنالوژۍ له پلوه هم د افغانستان نوم روښانه کړي.

د صنعت او سوداګرۍ وزارت سرپرست د تخنیکي او مسلکي زده کړو له ادارې سره د هر اړخیزې همکارۍ په اعلانولو سره وویل چې یوه مالیزیایي ګروپ ته یې بلنه ورکړې او هغوی حاضر دي چې ۲۵۰ زره سافت ویرونه د تخنیکي او مسلکي زده کړو ادارې ته وسپاري ترڅو ددې ادارې په پروګرامونو کې یو انقلاب راولي.

په پای کې د صنعت او سوداګرۍ وزارت سرپرست محترم الحاج نورالدین عزیزي د ځوانانو د تشویق او له هغوی څخه د ملاتړ او د تخنیکي او مسلکي زده کړو له ادارې او محصلینو سره د همکارۍ په موخه په نندارتون کې د یادې ادارې د ځوانانو ابتکارات او نوي توبونه وکتل.