د غیرالکولي نوشابه جاتو د تولیدي فابریکو له مسوولینو سره مشورتي او د نظر غوښتنې ناسته جوړه شوه
سه شنبه ۱۴ ربیع الاول ۱۴۴۶ / ۲۷ وږی ۱۴۰۳
د صنعت او سوداګرۍ وزارت د سرپرست محترم الحاج نورالدین عزیزي تر مشرۍ لاندې د غیرالکولي نوشابه جاتو د تولیدي فابریکو له مسوولینو سره د هېواد له بزګرانو څخه د ملاتړ په موخه د کانسینتریټ د تولید په اړه د نظر غوښتنې او مشورې یوه ناسته جوړه شوه.
پدې ناسته کې چې د روان لمریز کال د وږي په ۲۷مه جوړه شوې وه، د افغانستان د صنایعو او معادنو د خونې لومړي مرستیال محترم سخیاحمد پیمان او په کابل ولایت کې ددې خونې رییس هم ګډون درلود او د غونډې په ترڅ کې د کانسینتریټ د تولید په موخه د هېواد له کرهنیزو محصولاتو څخه پر ګټه اخیستنه او د هېواد په کورنیو فابریکو کې د هغې پر تولید بحث او خبرې وشوې.
محترم الحاج عزیزي دهېواد له تولیدي سکتور څخه پر هر اړخیز ملاتړ ټینګار وکړ او زیاته یې کړه : د صنعت او سوداګرۍ وزارت د پالیسیو په اړه هر ډول همکارۍ ته چمتو دی او د ارزښت او ستونزو د زنځیر د بشپړولو په موخه اړینه ده تر څو له یوبل سره لاسونه ورکړو.
د ناستې په پای کې د غیرالکولي نوشابو اتحادیې ته دنده وسپارل شوه ترڅو د فابریکو ظرفیت او نورو اړونده مسایلو ته په پاملرنې سره پدې اړه یوه جامع طرحه ترتیب کړي.
