په جلال اباد ښار کې د "نارنج ګل" ملي او نړیوال درې ورځنی نندارتون جوړ شو

دوشنبه16 شوال المکرم 1446 / 25 حمل 1404

د هېواد د ختیځ زون اړوند د ننګرهار ولایت په مرکز جلال آباد ښار کې د "نارنج ګل" ملي او نړیوال درې ورځنی نندارتون چې د پنجشنبې په ورځ د۱۴۰۴ لمریز کال د وري یا حمل په ۲۱ مه جوړ شوی و، تر دریو ورځو وروسته د وري په ۲۳مه پای ته ورسید.

یاد نندارتون چې د سیکارام احمدي شرکت له خوا د صنعت او سوداګرۍ وزارت او د دغه ولایت د صنايع او معدن خونې په همکارۍ د جلال اباد ښار د سراج العمارة بڼ د کرکټ په میدان کې د يوې سترې غونډې په ترڅ کې پرانیستل شو.

د دغه ندارتون په پرانیست غونډه کې د ننګرهار ولایت د صنعت او سوداګری رئیس الحاج سید عبدالبصیر پاچا ګډونوالو ته د ښه راغلاست وویل او د نندارتون دجوړیدو پر اهمیت او شا لید یې رڼا واچوله. همدارنګه د سيکارام احمدي بازار موندنې شرکت اجرايوي ريیس مسعود حقمل پيمان هم په خپلو خبرو کې له تولو غرفه لرنکو د مننې تر څنګ د صنعت او سوداګرۍ وزارت له چارواکیو او د ننګرهار ولایت له مقام او اړونده ادارو څخه یې مننه وکړه، چې د دغه نندارتون په جوړېدو کې یې له دوې سره مرسته او همکاري کړی ده.

همدارنګه د نندارتون په پرانیست غونډه کې د ننګرهار مرستیال والي محترم مولوي عزیز الله مصطفی پر ټولو شتمنو او پانګوالو غږ وکړ ترڅو په خپل یواد کې پانګونه وکړي او ډاډ یې ورکړ چې اسلامي امارت به پانګوالو ته ټول سهولتونه برابر کړي.

له یادې غونډې وروسته رسماً نندارتون پرانیستل شو او ټولو مشرانو په ګډه د داخلي تولیداتو له غرفو څخه د لیدنه وکړه.

دغه نندارتون له پرانیستل کېدو درې ورځو وروسته د وري په ۲۳مه پای ته ورسید چې د چارواکو په وینا په دریو ورځو کې د ننګرهار، لغمان او کنړ ولایتونو زر ګونو تنو اوسیدونکو له دغه نندارتون څخه لیدنه وکړه.

د ننګرهار د صنعت او سوداګرۍ ریاست وایي چې په دغه نندارتون کې د ننګرهار او د هیواد نورو ولایتونو د تولیداتو او محصولاتو ۱۲۰ غرفې جوړې شوې وې.