په کابل کې د ازبېکستان جمهوریت د تولیداتو او محصولاتو نندارتون پرانیستل شو
شنبه ۱۳ صفرالمظفر ۱۴۴۶ / ۲۷ زمری ۱۴۰۳
د افغانستان د اسلامي امارت د ریاست الوزرا اقتصادي مرستیال محترم عبدالغنی برادر آخند، د ازبېکستان جمهوریت لومړي وزیر ښاغلي عبدالله عارفاف، د افغانستان د اسلامي امارت د صنعت او سوداګرۍ سرپرست وزیر محترم الحاج نورالدین عزیزي او د ازبېکستان د پانګونې، صنعت او سوداګرۍ وزیر ښاغلي لزیز قدرتوف، د افغانستان او ازبېکستان تر مینځ د سوداګریزې ناستې په څنډه کې، په کابل کې د ازبیکستان د تولیداتو او محصولاتو نندارتون پرانیست.
پدې نندارتون کې په بېلابېلو سکتورنو کې د ازبېکستان هېواد محصولات او تولیدات لکه د موټرو بېلابېل ډولونه، ګړندي مزل وهونکي، بار وړونکي، مسافر وړونکي، د اور لګېدنې ضد،جرثقیل، بېلابېل ډول زراعتي ماشینونه، خوراکي توکي، د اغوستنې وړ لباس، برقي سامان آلات، غالۍ د دریو ورځو لپاره نندارې ته وړاندې شوې دي.
د یادونې وړ ده چې د دې نندارتون په پرانیست غونډه کې د افغانستان د اسلامي امارت او ازبېکستان جمهوریت ګڼ چارواکي او مشران او د دواړو هېوادو د خصوصي سکتور استازو هم ګډون درلود.
