د افغانستان د صنعت او سوداګرۍ وزارت معین ښاغلي مولوي احمد الله زاهد په خپل کاري دفتر کې له اوزبیک پانګوالو سره لیدنه وکړه
نېټه: یکشنبه 16 رمضان المبارک 1446 / 26 کب 1403
نن د افغانستان د صنعت او سوداګرۍ وزارت معین، ښاغلي مولوي احمد الله زاهد، د اوزبیکستان هیواد له یو شمېر پانګوالو سره یوه مهمه غونډه ترسره کړه. په دې غونډه کې اوزبیک پانګوالو د افغانستان په ساختماني او کان کیندنې برخو کې د پانګونې لپاره خپله لیوالتیا څرګنده کړه.
ښاغلي مولوي احمد الله زاهد د دې پرېکړې تود هرکلی وکړ او د ساختماني او کان کیندنې په برخو کې د شته فرصتونو په اړه یې مفصل معلومات ورکړل. هغه وویل چې افغانستان اوس په بشپړ ډول خوندي دی او د دغو برخو لپاره د ودې او پرمختګ لپاره پراخه امکانات شتون لري.
د پانګونې د بهیر د لا اسانتیا لپاره، ښاغلي زاهد ازبک پانګوالو ته ډاډ ور کړ چې د افغانستان اسلامي امارت د داخلي او بهرني پانګه والو هر راز ملاتړ کوي. هغه زیاته کړه چې د صنعت او سوداګرۍ وزارت د هر ډول ملاتړ لپاره چمتو دی او د پانګوالو ستونزې او اړتیاوې به په لومړیتوب کې حل کړي.
د افغانستان د صنعت او سوداګرۍ وزارت هیله څرګنده کړه چې دا پانګونې به د افغانستان اقتصادي ودې ته وده ورکړي او د دواړو هېوادونو ترمنځ د اقتصادي اړیکو د لا ټینګېدو لامل شي.
