د الماتا په سفر کې د ګډون کوونکي خصوصي او دولتي سکتور له استازو سره عمومي ناسته
پنجشنبه ۱۴ ربیع الثانی ۱۴۴۶ / ۲۶ تله ۱۴۰۳
د ا.ا.ا. د صنعت او سوداګرۍ وزارت د سرپرست محترم الحاج نورالدین عزیزي په مشرۍ د قزاقستان د الماتا په ښار کې د لا زیاتې همغږۍ او نظم په موخه، د ګډون کونکي دولتي او خصوصي سکتور د استازو یوه عمومي ناسته نن د تلې(میزان) په ۲۶ مه نېټه د یاد وزارت په تالار کې جوړه شوه.
پدې ناسته کې د صنعت او سوداګرۍ پر وزیر سربېره د کانونو او پټرولیم وزارت معین محترم شیخ ضیاءالرحمن آریوبي او د چارو د ادارې د لوی ریاست د پانګونې د آسانتیا رییس محترم مولوی انجنیر احمد ضیاءخالد او قزاقستان ته د تلونکي د خصوصي او دولتي سکتور استازو هم ګډون درلود.
په ناسته کې محترم الحاج عزیزي د افغانستان د اسلامي امارت اقتصادي پالیسیو، د تېرو سفرونو تجربو او په تېر کې د نندارتونو جوړولو تجربو ته په پاملرنې سره وویل: اوس د افغانستان د اسلامي امارت پروګرامونو په سیمه ییزه او نړیواله کچه خپل ځای پیدا کړی دی او همدارنګه یې له ټولو ګډونوالو وغوښتل ترڅو له هغه ورځو څخه چې هلته هستوګن دي، تر ټولو ډیره او غوره ګټه پورته کړي، ځکه دده په خبره ددې ډول نندارتونو جوړول د سوداګرۍ د نړیوال توب ته زمینه برابروي.
همدارنګه محترم عزیزي له دوی وغوښتل ترڅو د افغانستان په استازیتوب سفر کونکی پلاوی، نظم مراعات کړي او باید اسلامي چار چلند ولري.
همدا راز پدې ناسته کې د خصوصي سکتور یو شمېر غړیو د دې ډول سفرونو او پروګرامونو دلا ښه والي لپاره خپل لید لوري او وړاندیزونه په مجلس کې شریک کړل.
