د سکتوري خونو غړیو ته د صنعتي ساحو د قانون په اړه معلومات ورکړل شول
شنبه ۱۱ ربیع الاول ۱۴۴۶ / ۲۴ وږی ۱۴۰۳
د افغانستان د اسلامي امارت د صنعت او سوداګرۍ وزارت د سرپرست محترم الحاج نورالدین عزیزي تر مشرۍ لاندې د صنعتي سیمو (پارکونو) قانون د تنفیذ څرنګوالي په اړه ناسته د هېواد د سکتوري خونو د استازو په ګډون د سنبلې په ۲۴ مه، د یاد وزارت د پانګونې په تالار کې ترسره شوه.
پدې ناسته کې د هېواد د صنعت او سوداګرۍ وزارت سرپرست پدې ټکي ټینګار وکړ چې د اقتصاد په برخه کې دا لومړی قانون دی چې د عالیقدر امیرالمومنین حفظه الله، له اړخه توشیح شوی او زیاته یې کړه چې پدې وزارت کې مې د خپل ماموریت په لومړیو ورځو کې ژمنه کړې وه چې هېواد به د صنعتي کېدو پر لور بیایم.
ښاغلي عزیزي همدا راز زیاته کړه چې تر اوسه یې په صنعتي پارکونو کې د ځمکې د ځانګړې کولو لپاره له پانګوالو څه د پاسه ۸۰۰ درخواستونه تر لاسه کړي دي.
د ناستې په دوهمه برخه کې د دې وزارت د حقوقي چارو د ریاست له خوا یو پریزینتیشن حاضرینو ته وړاندې شو او په ترڅ کې یې ګډونوالو ته د دې قانون د ګټو په اړه معلومات ورکړل.
د ناستې په پای کې د یوه آزاد بحث په ترڅ کې د ګډونوالو پوښتنو ته ځوابونه ورکړل شول.
