د صنعت او سوداګرۍ وزارت مشرتابه له وړو مالي تمویلاتو څخه د ملاتړ په کنفرانس کې ګډون وکړ
چهارشنبه 11 جمادی الاول 1446 / 23 عقرب 1403
له وړو مالي تمویلونو څخه د ملاتړ کنفرانس د افغانستان اسلامي امارت د ریاست الوزرا د اقتصادي مرستیال محترم ملا عبدالغني برادر آخند،د صنعت او سوداګرۍ وزارت د سرپرست محترم الحاج نورالدین عزیزي، د افغانستان بانک لوی رییس محترم نورمحمد آغا، د ځینو کورنیو او بهرنیو موسسو د چارواکو او تمویل کونکو په ګډون، نن چهارشنبه د ۱۴۰۳ لمریز کال د لړم(عقرب) په ۲۳ مه په کابل کې جوړ شو.
د ا.ا.ا د صنعت او سوداګرۍ وزارت سرپرست محترم الحاج نورالدین عزیزي پدې کنفرانس کې د هېواد د مرکزي بانک له مشرتابه څخه ددې ډول کنفرانسونو د جوړولو له امله قدرداني وکړه او د نړیوالې ټولنې بشردوستانه مرستو څخه یې په مننې سره وویل چې: د افغانستان اسلامي امارت د خصوصي سکتور له لارې د اقتصادي ودې او پرمختګ د پالیسۍ په درلودلو سره له خصوصي تشبثاتو څخه ملاتړ ته چې د افغانستان د اقتصاد د ملا تیر جوړوي، د خپلو پروګرامونو په لومړي سر کې ځای ورکړی دی.
محترم الحاج عزیزي د خپلو خبرو په دام د صنعت او سوداګرۍ وزارت اړوند هغه اصلاحي قوانین، مقررې او پروګرامونه یاد کړل چې له خصوصي سکتور څخه د ملاتړ او دغه سکتور ته د لازیاتو آسانتیاوو د برابرولو، د صنعت د ودې، د ټولو لپاره د دندو د پیدا کولو، د ملي عوایدو د کچې د لوړولو، د صادراتو د زیاتوالي، د داخلي صنایعو په کچه خود کفایي او په ټوله کې د یوه پیاوړي او جامع خصوصي سکتور له جوړښت څخه د ملاتړ لپاره په پام کې نېول شوي دي.
د صنعت او سوداګرۍ وزارت سرپرست محترم الحاج نورالدین عزیزي د خصوصي سکتور د ودې ملي او نړیوالو مارکیټونو ته د لاسرسي، د صادراتو د ودې، خلکو لپاره د دندو د پیدا کېدو، له نورو هېوادو سره د اقتصادي او سوداګریزو اړیکو د پراختیا لپاره د اساسي بنسټونو پر جوړولو په ټینګار سره، دغه کنفرانس د اقتصادي ماتې او ورشکستګۍ او په تېر کې د وړو مالي تمویلاتو د اړونده موسسو د فعالیت د کمښت د لاملونو د پیدا کولو او همدارنګه د نویو پروګرامونو د غوره او ښه تطبیق لپاره یو ښه فرصت و ګڼلو.
په پای کې د صنعت او سوداګرۍ وزارت سرپرست محترم الحاج نورالدین عزیزي له تمویل کوونکو څخه وغوښتل چې د شته ستونزو او ګواښونو په پام کې نیولو سره اوس هم په بېلابیلو برخو کې د اقتصادي پرمختګ او د خلکو د ژوند سطحې لوړولو لپاره شته فرصتونه و ارزوي.
