په ترکیه کې د افغان سوداګرو او پانګه والو شورا له رییس او مشرتابه پلاوي سره لیدنه
سه شنبه ۱ جمادی الثانی ۱۴۴۶ / ۱۳ لینډی ۱۴۰۳
د ا.ا.ا.د صنعت او سوداګرۍ وزارت سرپرست محترم الحاج نورالدین عزیزي او ورسره مل پلاوي په ترکیه کې د خپلې هستوګنې په دوام، د چارو د سمون او په ترکیه کې د مېشت افغان سوداګرو او خصوصي سکتور د ستونزو د حل په موخه، هلته د مېشتو افغان سوداګرو او پانګوالو د ټولنې له رییس الحاج احسانالله کامهوال او د یادې ټولنې د مشرتابه شورا له غړیو سره وکتل.
د صنعت او سوداګرۍ وزارت سرپرست پدې لیدنه کې په افغانستان کې د پانګونې پر شته فرصتونو په ټینګار سره وویل چې اداري فساد او په اداراتو کې د کاغذپرانۍ پروسه له مینځه تللې او په ټول افغانستان کې امنیت تینګ شوی دی چې تاسو کولای شئ آن د چین تر پولې چې نژدې شل کیلو متره سړک یې جوړ شوی دی، پرته له اندېښنې سفر وکړئ او هلته سوداګري او پانګونه وکړئ.
محترم الحاج عزیزي زیاته کړه چې په لومړیو میاشتو کې ځینې ستونزې وې چې د الله په مرسته او د اسلامي امارت د مسؤولینو په هڅو دغه ستونزې حل شوې او اوس د اسلامي امارت د ټولو کارکونکو معاش له بهرنیو مرستو پرته او له کورنیو عوایدو څخه ورکول کېږي.
د صنعت او سوداګرۍ وزارت سرپرست د خپلو خبرو په دوام زیاته کړه چې د افغانستان اسلامي امارت او امیرالمومنین تاسو ته د امارت د اقتصادي مجاهدینو په سترګه ګوري او له مونږ یې غوښتې ترڅو تاسو افغانستان ته بېرته ستنیدو ته دعوت کړو.
