جمهوررئیس: دولت د افغانستان په هره نقطه کې د صنعت د انکشاف ملاتړی دی
د افغانستان د اسلامي جمهوریت جمهوررئیس محمداشرف غني نن له غرمې مخکې د چهار چنارماڼۍ مخته د محمدامین نور کمپنۍ د موټرونو او افغان پاور بټریو بېلابېلې نمونې له نږدې ولیدې.
د محمدامین نور کمپنۍ له دغو تولیداتو څخه د لیدنې پرمهال چې د هیواد لومړۍ مېرمن هم د جمهوررئیس ملتیا کوله، د یادې کمپنۍ مسوول جمهوررئیس غني ته د معلوماتو ورکولو پرمهال وویل، دوی لس ډوله بېلابېل برېښنایي او پټرولي موټرونه تولیدوي چې تر ۴۵۰ کیلو ګرام پورې وزن لېږدولی شي.
نوموړي وویل، د دغو موټرونو پرزې له چین څخه راوړل کېږي، مګر د ډیزاین او باډۍ جوړولو چارې یې په هیواد کې ترسره کېږي او د دولت دملاتړ په صورت کې به یې تولیدات او کاري زمینې زیاتې شي. همدارنګه یې خپلې غوښتنې او وړاندیزونه هم له جمهوررئیس سره شریک کړل.
د جمهوري ریاست د ملي پراختیا د عملیاتي او ملاتړې ادارې عمومي رئیس احمد وفي امین د دغه شرکت له موټرونو څخه چې له تېر کال راهیسې په ارګ کې ورڅخه استفاده کېږي خوښي وښوده او وې ویل، د ارګ په داخل کې د استفادې لپاره نور د اړتیا وړ موټرونه به هم په مناسبه بیه له دوی څخه وپېري، ځکه چې غږ او لوګی نه لري.
جمهوررئیس غني د محمدامین نور شرکت مسوولینو ته د مبارکۍ پرمهال وویل، د خوښۍ ځای دی چې نن موږ د یو ژمن افغان د پانګونې او لمریزې انرژۍ څخه د استفادې شاهدان یوو او د دوی پر وړاندې حقوقي مسایل به ژر حل شي.
محمداشرف غني څرګنده کړه، دولت د افغانستان په هره نقطه کې د صنعت د انکشاف ملاتړی دی او د دوی په ګډون به د پانګوالو او تولیدونکو د ملاتړ په موخه لازمې اسانتیاوې ورته برابرې شي.
جمهوررئیس د محمدامین نور شرکت مسوول ته سپارښتنه وکړه چې د زړو بټریو د پروسس په ګډون په خپلو تولیداتو کې باید چاپیریال ساتنې ته ځانګړې پاملرنه وکړي.
جمهوررئیس غني د محمدامین نور شرکت برېښنایي موټر ته د چهار چنار ماڼۍ مخته له دورې ورکولو وروسته د بټن په کېکاږلو سره د افغان پاور بټرۍ په وسیله ګروپونه روښانه کړل او د یاد شرکت مسوولینو ته یې د روښانه راتلونکي هیله وکړه.
