د صنعت او سوداګرۍ وزارت مرستیال د صنعت اونۍ او نړیوال نندارتون څخه لیدنه وکړه
سه شنبه۵ ذوالقعدةالحرام ۱۴۴۵ / ۲۵ غویی ۱۴۰۳
د صنعت او سوداګرۍ وزارت مرستیال مولوي قدرت الله جمال د صنعت اونۍ او نړیوال نندارتون د دریمې ورځې په دوام د داخلي شرکتونو له تولیداتو څخه لیدنه وکړه.
یاد نندارتون چې دتیرې یکشنبې په ورځ پرانستل شوی او تر یوې اونۍ پورې به دوام وکړي په سلګونه قلمه داخلي تولیدات نندارې ته وړاندې شوي دي.
ښاغلي جمال او د معدن صنایع خونې معاون ظریف ګل ځدران، د صنایعو اتحادې رئیس عبدالجبار صافی سره یو ځای په یاده لیدنه کې دتعمیراتي رنګونو فیضي ګروف ، شرکت امارتي سیلو مرکز، صنایع غزایی امینی ، ګلرنګ شوینده شرکت ، ادویه ګیاهي، پاپوش سکتور، دلاسي صنایعو، قالینو او یو شمیر نورو شرکتونو له مسؤلینو سره د تولیداتو په اړه خبرې وکړې.
دشرکتونو مسؤلینو دکیفیت، کمیت او قیمتونو په اړه ډاډ ورکړ، خپلې غوښتنې او د صنعت په برخه کې د لا ښه پرمختګ په اړه یې دوه اړخیزه مشورې شریکې کړې او همداراز د شرکتونو مسؤلینو زیاته کړه چې د امارت له راتګ سره يې د صنعت او تولیداتو په برخه کې بې ساری پرمختګ کړی او په ډیرو برخو کې خود کفا او یا هم پر ځان بسیاینې ته نږدې شوي یو.
ښاغلي جمال دخپلو تولیداتو ستاینه وکړه او صنعتکارانو ته یې د هر راز همکارۍ او ملاتړ ډاډ ورکړ او زیاته یې کړه چې تل هڅه کوؤ دخپل ولس ، صنعتکارانو او تجارانو سره په شریکه کار وکړو ترڅو مو افغانستان په یو صادراتي هیواد بدل شي.
