دوشنبه دسلواغې ۶ مه ۱۳۹۹

داپټا هوکړه لیک په متن کې دتعدیل راوستلو، دنظر ورکولو او وړاندیزونو په اړه دوه ورځنی ورکشاپ پایته ورسید .

دغه ورکشاپ چې دصنعت او سوداګرۍ وزیر ښاغلي غوریاني په مشرۍ جوړ شوی وو، ددولتي او خصوصي سکتور یو شمېراستازو، اړونده ادارو او دحرکت موسسې پکې ګډون کړی وو.

دیاد ورکشاپ په پای کې دصنعت او سوداګرۍ وزیر ښاغلي غوریاني وویل چې افغانستان داپټا هوکړه لیک (دافغانستان او پاکستان ترمنځ دسوداګرۍ او ترانزیټ هوکړه لیک )په متن کې دنړیوال سوداګریز سازمان له اصولو سره سم تعدیلات رامنځته کول غواړي.

ښاغلي غوریاني یو ځل بیا ټینګار وکړ چې داپتیکا په اوومه او اتمه ناسته کې ګډون کوونکي پلاوي دخصوصي سکتور له حقونو څخه په کلکه ننګه کړې او دنړیوال سوداګریز سازمان له اصولو سره سم یې داپټا په هوکړه کې دتعدیل غوښتنه کړې ده او دتعدیل دا طرحه یې دپاکستان دسوداګرۍ وزارت ته وړاندې کړې ده.

دغه دوه ورځنی ورکشاپ چې په صنعت او سوداګرۍ وزارت کې جوړ شوی وو، دخصوصي سکتور او دولتي نهادونو استازو دافغانستان او پاکستان تر منځ دترانزیټ او سوداګرۍ هوکړې (اپټا ) په متن کې دتعدیل راوستلو په موخه خپل نظرونه او وړاندیزونه له صنعت او سوداګرۍ وزارت سره شریک کړل.