دکندهار ولایت دصنعت او سوداګرۍ ریاست له کارکوونکو سره ددې وزارت دمعین لیدنه
دوشنبه دغبرګولی ۳یمه ۱۴۰۰
د صنعت او سوداګرۍ وزارت معین محمد سلیمان بن شاه ، چې د صنعت کارانو ، سوداګرو او پانګوالو پر وړاندې د شته فرصتونو او ننګونو د ارزونې په موخه کندهار ولایت ته سفر کړی، د کندهار د صنعت او سوداګرۍ د ریاست له کارکوونکو سره یې وکتل.
په دې ناسته کې محمد سلیمان بن شاه د خصوصي سکتور لپاره د خدماتو وړاندې کولو او لازمو اسانتیاو په برابرولو کې د کندهار د صنعت او سوداګرۍ د ریاست د کارکوونکو له کړنو ستاینه وکړه او ویې ویل چې د دې ریاست کارکوونکي د خپلو دندو ترسره کولو په برخه کې ژمن دي.
دغه راز په دې ناسته کې د کندهار ولایت د صنعت او سوداګرۍ ریاست یوکارکوونکی چې خپلې دندې یې په ښه ډول ترسره کړې وې د صنعت او سوداګرۍ وزارت مشرتابه لخوا په ستاینلیک او نغدي مرستې وستایل شو.
په دغه غونډه کې ، د صنعت او سوداګرۍ وزارت معین زیاته کړه چې په نږدې راتلونکي کې به د صنعت او سوداګرۍ وزارت په ولایتونو کې د دې ریاستونو د کارکوونکو اداري ستونزې حل کړي ترڅو دوی وکولی شي په ډاډ سره کار وکړي.
