د افغانستان د اسلامي امارت پلاوي په وچه کې د نړۍ له تر ټولو ستر بندر څخه لیدنه وکړه
شنبه ۱۶ ربیع الثانی ۱۴۴۶ / ۲۸ تله ۱۴۰۳
د ا.ا.ا. د صنعت او سوداګرۍ وزیر محترم الحاج نورالدین عزیزي په مشرۍد قزاقستان الماتا ته د افغانستان د خصوصي او دولتي سکتور د ګډ پلاوي د رسمي سفر په دوهمه ورځ، دولتي پلاوي نن شنبه د روان لمریز کال د تلې( میزان) په ۲۸ مه نېټه په وچه کې د نړۍ تر ټولو ستر بندر او دنړۍ له آزادې سیمې چې په یاد هېواد کې واقع دی، او هلته له روانو فعالیتونو څخه لیدنه وکړه.
د "خارگوس" بندر چې په وچه کې د نړۍ پر تر ټولو ستر بندر مشهور دی، د چین او قزاقستان هېوادونو تر مینځ پروت دی چې د چین د یوه کمربند او یوه لار لویه پروژه هم له دغه لارې څخه په تېریدو د اروپا له لویې وچې سره نښلي.
د یادونې وړ ده چې د افغانستان د دولتي او خصوصي سکتور یوه ګډ پلاوي تېره ورځ د افغانستان د تولیداتو او محصولاتو نندارتون د جوړولو، د قزاقستان هېواد له دولتي چارواکو سره د لیدلو، سوداګریزو ناستو او ګڼو نورو پرواګرامونو په موخه، د قزاقستان هیواد پخوانۍ پلازمینې آلماتا ښار ته سفر کړی دی.
