د خصوصي سکتور له استازو سره په ترمذ کې د نړیوال سوداګریز مرکز په اړه مشورتي ناسته ترسره شوه
سه شنبه ۳۰ صفرالمظفر ۱۴۴۶ / ۱۳ وږی ۱۴۰۳
د ترمذ په بندر کې د نړیوال سوداګریز مرکز تر پرانیستل کېدو وروسته، نن سه شنبه د سنبلې ( وږي) په ۱۳مه، د صنعت او سوداګرۍ وزارت د سرپرست محترم الحاج نورالدین عزیزي تر مشرۍ لاندې، د هېواد د خصوصي سکتور د استازو په ګډون یوه مشورتي ناسته، له دغه مرکز څخه د موثرې ګټې اخیستنې په اړه جوړه شوه.
پدې ناسته کې د خصوصي سکتور استازو د صنعت او سوداګرۍ وزارت له مشرتابه څخه د سوداګرۍ او پانګونې په برخه کې د آسانتیاوو را مینځ ته کولو له امله مننه وکړه او په ترمذ ښار کې یې د نړیوال سوداګریز مرکز پرانیستل کېدل د افغانستان د سوداګرۍ او راکړې ورکړې ته په مهم ګڼلو سره هغه د هېواد په ګټه وبللو.
هغوی همدارنګه له یاد نړیوال مرکز څخه د ښې ګټې اخیستنې لپاره خپل نظریات او وړاندیزونه د صنعت او سوداګرۍ له وزیر سره شریک کړل.
همدارنګه محترم الحاج عزیزي په ترمذ ښار کې نړیوال سوداګریز مرکز د افغانستان د صادراتي توکیو د بسته بندۍ او پروسس لپاره او د هېواد د نورو سوداګریزو اړتیاوو د پوره کولو لپاره ګټور وګنلو او ویې ویل چې دغه مرکز ته د افغان سوداګرو او پانګوالو ور پېژندنه به د صنعت او سوداګرۍ وزارت له خوا ترسره کېږي.
د صنعت او سوداګرۍ وزارت سرپرست پدې ناسته کې د افغانستان د صادراتي توکیو د اعتبار پر ساتلو ټینګار وکړ او له ټولو صادرونکو څخه یې وغوښتل چې په خپلو صادراتو کې د هدف وړ هېوادونو معیارونه په پام کې ونیسي ترڅو د افغانستان صادرات په خپل قوت سره دوام وومومي.
په نتیجه کې د هېواد د سکتوري خونو او د غالیو د تولیدونکو او صادرونکو په استازیتوب پنځه تنه د همغږۍ کونکو په توګه د بلخ ولایت له مشرتابه سره دخبرو لپاره وټاکل شول.
