د سوداګري وزارت مرستیال د لوګر ولایت له معاون سره وکتل
د صنعت او سوداګري وزارت مرستیال ښاغلي مولوي قدرت الله جمال د غونډو په عمومي تالار کې د لوګر ولایت له معاون, د یاد ولایت د صنعت او سوداګري آمر او د خصوصي سکتور له استازو سره وکتل. د لیدنې پر مهال د د لوګر ولایت معاون مولوي انعام الله د سوداګري آمریت لپاره د تعمیر د جوړښت او د آمریت په ریاست د بدلولو غوښتنه وکړه. ورپسې د خصوصي سکتور استازو په یاد ولایت کې د سوداګري په وړاندې د پرتو ستونزو یادونه وکړه.
د سوداګري وزارت مرستیال ښاغلي قدرت الله جمال د خپلو خبرو په ترڅ کې د ستونزو د حل ډاډ څرګند کړ. نوموړي زیاته کړه چې د تعمیر جوړونې او ریاست ته د ارتقا لپاره باید وزارت ته رسمي وړاندیزونه وشي تر څو يې د حل لپاره کوټلي ګامونه پورته شي. ښاغلي جمال د صنعتي پارکونو موضوع ته اشاره وکړه او زیاته يې کړه چې د پارکونو د ځمکو اړوند تګلاره یو ډول او عمومي ده. همدا راز په وینا يې چې د لوګر د صنعتي پارک لپاره د بریښنا د رسولو اړوند موضوع يې د بریښنا شرکت سره شریکه کړې او په حل يې کار روان دی.
