چین ته د افغاني صادراتو د زیاتوالي په اړه بحث او د نظرونو تبادله
سه شنبه 25 رمضان المبارک 1446 / 5 حمل 1404
کابل- د افغانستان اسلامي امارت د صنعت او سوداګرۍ وزارت سرپرست په افغانستان کې د چین د خلکو جمهوریت له سفیر ښاغلي "ژاو شینگ" سره وکتل او په اړونده مسایلو یې خبرې اترې وکړې.
پدې کتنه کې د دواړو هېوادو ترمینځ د سوداګریز توازن پر ټینګښت ټینګار وشو او دواړو لوریو چین ته له افغانستان څخه د صادراتو د زیاتوالي او په تېره بیا د جلغوزیو،انارو، قیمتي ډډبرو لکه نفرائت، اونکس، لاجورد، تالک او داسې نورو محصولاتو په اړه خبرې وشوې او نظرونه سره تبادله شول.
د دې کتنې او مذاکراتو موخه چین ته د افغانستان نېغ په نېغه صادراتو په لار کې د آسانتیاوو راوستل و تر څو چین ته د افغانستان صادراتي توکيو او مالونو او همدارنګه افغانستان ته د بېلابلو اقتصادي سکتورونو د ودې په موخه د اړتیا وړ ماشینونو د واردولو په لار کې د ترانزیتي او لېږد رالېږد لګښتونو کم شي.
د دې خبرو اترو په پایله کې دواړو لوریو هوکړه وکړه تر څو د لا زیاتې همغږۍ، د سوداګریزو اړیکو د پراختیا او د سوداګرۍ په ډګر کې د لازمو آسانتیاوو د رامینځ ته کولو په موخه یوه ګډه کاري ډله جوړه کړي چې منظمې غونډې به ولري.
د افغانستان د اسلامي امارت د صنعت او سوداګرۍ وزارت ژمن دی تر څو له بېلابېلو هېوادو سره د اقتصادي او سوداګریزو اړیکو په پراختیا سره د ملي صادراتو د ودې او د هېواد د اقتصادي پیاوړتیا لپاره زمینه برابره کړي.
