د پنجشېر ولایت امنیه قومندان د سوداګرۍ وزارت له مرستیال سره لیدنه ترسره کړه
چهارشنبه مورخ ۳۰محرم ۱۴۴۵ / ۲۶زمری ۱۴۰۲
د صنعت او سوداګري وزارت مرستیال ښاغلي مولوي قدرت الله جمال د پنجشېر ولایت له امنیه قومندان قاري احمدالله بدر سره په خپل کاري دفتر کې وکتل. ښاغلي بدر د خپلو خبرو په ترڅ کې ډاډ ورکړ چې پنجشېر کې د سوداګریزو فعالیتونو لپاره ډاډمنه فضا رامنځته شوې او هیڅ ډول امنیتي ستونزه وجود نلري. نوموړي وویل د سوداګرۍ وزارت سره په همغږي به د سوداګرو لپاره له امنیتي پلوه د غوره شرائطو په رامنځته کولو کې خپله همکاري درېغ نکړي.
د سوداګرۍ وزارت مرستیال مولوي قدرت الله جمال د ښاغلي بدر د راتګ څخه د مننې تر څنګ د پنجشېر د امنیه قومندانۍ هلې ځلې وستایلې. نوموړي زیاته کړه چې د سوداګرۍ وزارت د نورو ولایتونو په څېر په پنجشېر کې هم د سوداګرۍ او سوداګرو لپاره د اسانتیاوو برابرولو لپاره خپلې هڅې دوامداره ساتلې. په وینا یې په نزدې راتلونکې کې به پنجشېر ولایت ته یو مهم سفر ولري تر څو له نزدې د شته فرصتونو ارزونه وکړي او په اړه یې کوټلي ګامونه پورته کړي.
