د صنعت او سوداګرۍ وزارت مرستیال د بي بي خدیجه الکبری له نندارتون څخه لیدنه وکړه
پنج شنبه مورخ ۲ جمادی الاول ۱۴۴۵ / ۲۵ لړم ۱۴۰۲
د صنعت او سوداګرۍ وزارت مرستیال محترم مولوي قدرت الله جمال د بي بي خدیجه الکبری رضی الله عنها له نندارتون څخه لیدنه وکړه.
ښاغلي جمال د ې نندارتون له غرفو څخه د لیدنې پر مهال په هېواد کې د ښځینه متشبثینو ستونزې او ننګونې هم واورېدې او د هغوی د ستونزو د حل په برخه کې یې د هر راز همکارۍ ژمنه وکړه.
نوموړی په دغه نندارتون کې د افغانستان له ګوټ ګوټ څخه د متشبثو ښځو له ګډون څخه خوښي څرګنده کړه او زياته يې کړه؛ د اسلامي امارت له حاکمیت سره په ټول هېواد کې امنيت تامين شوى او نن د هېواد له هر ګوټ څخه ښځو په دې نندارتون کې ګډون کړى دى.
يو شمېر ګډون کوونکو مېرمنو د صنعت او سوداګرۍ وزارت له رهبرۍ څخه د صنعت کارانو او متشبثينو له ملاتړ څخه مننه وکړه.
د يادونې وړ ده چې د بي بي خديجه الکبری رضی الله عنها په نندارتون کې څه باندې ٨٠٠ غرفو کې د هېواد ګڼو سوداګرو او صنعت کارو مېرمنو خپل توليدات او لاسي صنايع د اوو ورځو لپاره نندارې ته وړاندې کړي دي.
