د تشبثاتو سکتور د ملاتړ او پیاوړتیا په موخه له ۱۵ موسسو سره د هوکړه لیکونو لاسلیک

پنجشنبه 6 رمضان المبارک 1446 / 16 کب 1403

د ا.ا.ا.د صنعت او سوداګرۍ وزارت سرپرست محترم الحاج نورالدین عزیزي نن پنجشنبه د ۱۴۰۳ لمریز کال د کب په ۱۶مه نېټه د تشبثاتو سکتور څخه د ملاتړ او پیاوړتیا په موخه له ۱۵ ملي او نړیوالو موسسو سره د همکارۍ هوکړه لیکونه لاسلیک کړل.

د صنعت او سوداګرۍ وزارت مشرتابه د حلال رزق پر ګټلو او په چارو کې پر صداقت باندې په ټینګار سره وویل چې د پروژو د پلي کولو پر وخت باید هڅه وشي چې حق خپل حقدار ته ورسېږي.

ټاکل شوې ده چې دغه ۱۵ موسسې به د ۱۲ میلیونه  ۴۷۵ زرو څلور سوه شپږ امریکایي ډالرو په ارزښت پراختایي او ښوونیزې پروژې په تېره بیا د کار زېږولو، پرمختګ،په هېواد کې د غالیو د صنعت د ودې، د جواهراتو او لاسي صنایعو د پرمختګ،د وړو او مینځنیو صنعتونو په لار کې د شته خنډونو د پېژندنې، د کورنیو لبنیاتو، سبزیچاتو او نورو اړتیا وړ توکیو د تولید او پروسس په برخه کې اړمنو کورنیو ته د روزنې او هغوی ته د اړتیا وړ وسایلو د برابرولو، د پستې او نورو اړتیا وړ توکیو د بسته بندۍ په برخه کې روزنه او مالي سواد،د پستې اړوند ماشینونو اخیستنې او تجهیز، له هغې څخه د یوه برند جوولو په برخه کې پلې کړي او د اتو تنو وړو او مینځنیو متشبثینو لپاره د سولري سیستم جوړونه او نصب چې په ټوله کې به په ۱۶ ولایتونو کې د تشبثاتو په برخه کې دغه پروژې پلې کړي.

 د یادونې وړ ده چې له دغه پروژو څخه به اوه زره او ۶۷۳ تنه په کابل، پکتیا، پکتیکا، خوست، بلخ، کندهار، لوگر، کندوز، بغلان، بدخشان، بادغیس، فاریاب، جوزجان، ننگرهار، تخار او بامیان ولایتونو کې ګټه واخلي.