د صنعت او سوداګرۍ وزارت او په افغانستان کې دیوناما دفتر تر مینځ د ګډو همکاریو پراختیا

سه شنبه ۲۰ رجب المرجب ۱۴۴۶ / ۲ سلواغه ۱۴۰۳

د افغانستان د اسلامي امارت د صنعت او سوداګرۍ وزارت سرپرست محترم الحاج نورالدین عزیزي نن سه شنبه د سلواغې (دلوې) په دوهمه په کابل کې د افغانستان لپاره د ملګرو ملتو سازمان د عمومي منشي له ځانګړې استازې او په افغانستان کې د ملګرو ملتو سازمان د ځانګړي پلاوي (یوناما) له مشرې، مېرمن "روزا اوتونبایوا" سره وکتل.

پدې کتنه کې د بېلابېلو موضوعاتو په اړه لکه د افغانستان صنعتي انکشافاتو، د تشبثاتو دمرکز جوړولو، د آنلاین سوداګرۍ د مرکز د پرانیستنې، له خصوصي سکتور څخه د ملاتړ، د صنعتي پارکونو د برېښنا او په افغانستان کې د خصوصي سکتور ستونزو ته د رسیدنې په اړه بحث او د نظرونو تبادله وشوه.

مېرمن" اوتونبایوا" د دوحې درې خصوصي سکتور د کاري ډلې په اړه معلومات ترلاسه کړل او د صنعت او سوداګرۍ وزارت هلې ځلې یې وستایلې. نوموړې همدارنګه په افغانستان کې پانګونې ته د رابلنې کنفرانس د بریالیتوب له امله چې پدې وروستیو کې د دغه وزارت له خوا جوړ شوی و، مبارکي وویله او وړاندیز یې وکړ چې دا ډول پروګرامونه دې د افغانستان په پنځو زونونو کې هم جوړ شي.

په ټوله کې دغه لیدنې په افغانستان کې له خصوصي سکتور څخه د ملاتړ او اقتصادي پرمختګ لپاره د ګډو همکاریو د پیاوړتیا لپاره د ګډې ژمنتیا څرګندونه کوله.