د وچې مېوې او زعفرانو یوه لویه جوپه د ځمکې له لارې اروپا, کاناډا او اسټرالیا ته صادره شوه
شنبه مورخ ۲ جمادی الاول ۱۴۴۴ / ۵قوس ۱۴۰۱
په دې هدف جوړو شوو مراسمو کې د صنعت او سوداګري وزارت مرستیال مولوي قدرت الله جمال, د افغانستان او پاکستان ګډې سوداګریزې خونې رئيس ښاغلي خان جان الکوزي, حکومتي چارواکو او د خصوصي سکتور استازو ګډون درلود.
د خپلې وینا په ترڅ کې د سوداګري وزارت مرستیال ښاغلي جمال د یادو توکو لیږد یو مهم پرمختګ وباله او ؤ يې ویل چې افغاني صادرات په نړیوالو بازارانو کې ځانګړی ارزښت لري. نوموړي د سوداګري وزارت په استازیتوب سوداګرو د بشپړ ملاتړ ډاډ ورکړ.
همدا رنګه ښاغلي جمال وویل چې د افغاني صادراتو یاده جوپه نه ړومبۍ ده او نه به وروستۍ شي بلکې دوام به پیدا کړي.
د یادونې وړ ده چې دغه جوپه چې ۱۲۰ ټنه توکي لري به د ازبکستان, قازقستان او روسیه له لارې اروپا, کاناډا او اسټرالیا ته ولېږدول شي.
