د صنعتي سیمو قانون پلی کېږي

یکشنبه ۲۱ صفرالمظفر ۱۴۴۶/ ۴ وږی ۱۴۰۳

د صنعت او سوداګرۍ وزارت د سرپرست محترم الحاج نورالدین عزیزي تر مشرۍ لاندې د یاد وزارت د رییسانو او کارمندانو په ګډون ددې وزارت د غونډو په عمومي تالار کې نن د سنبلې په څلورمه نېټه غونډه جوړه شوه.

په یاده غونډه کې د صنعتي ساحو هغه قانون چې نوی توشیح شوی دی، د  وزارت د حقوقي رییس له خوا تشریح او توضیح شو او د وزارت مشرتابه ددې قانون د پلي کولو لپاره لازمه وګڼله تر څو د هغې لپاره یو پلان او تګلاره جوړه شي.

ددې قانون له مخې باید یوه کومیټه جوړه شي چې تر څو په صنعتي پارکونو کې د ځمکو وېش ته لاره هواره کړي.یاد قانون په دریو برخو ویشل شوی چې امارتي، مشارکتي او خصوصي ځمکې سره جلا کوي.

همدارنګه ددې قانون موخه داده تر څو د صنعتي سیمو د تنظیم، د پانګونې لپاره د زمینې برابرولو او د صنعتي ساحو د ساتنې او څارنې له لارې د افغانستان د اقتصادي ودې او د ځمکو د وېش مدیریت ترسره شي.