د صنعتکارانو او سوداګرو سره لیدنه
چهارشنبه مورخ ۲۹ ربیع الاول ۱۴۴۵ / ۲۹ وږی ۱۴۰۲
د صنعتکارانو او سوداګرو د ستونزو د حل لپاره نن غرمه مهال د سوداګرۍ وزارت د غونډو په تالار کې ناسته وشوه. یاده ناسته چې د وزارت د مرستیال مولوي قدرت الله جمال په مشرۍ تر سره شوه پکې د وزارت یو شمېر رئیسانو، د معادنو او صنایعو خونې استازو او یو شمېر صنعتکارانو ګډون درلود.
د صنعتکارانو او سوداګرو په استازولي د معدنونو او صنایعو خونې رئیس ښاغلي شېرباز کمینزاده په مفصل ډول د صنعتکارانو او سوداګرو په ستونزو وغږېد. نوموړي د برېښنا، اطفایي خدمتونو، د ځمکو د وېش او د خامو موادو د راوړلو اړوند اندېښنې او وړاندیزونه د وزارت د مشرتابه سره شریکې کړې.
د وزارت مرستیال ښاغلي جمال د ستونزو د حل لپاره د وزارت چمتووالی وښود او په هراړخیزه همکاري یې ټینګار وکړ. د نوموړي په وینا ښکېلې ادارې او سوداګر په شریک کار سره دغه ستونزې حلولی شي او ډاډ یې ورکړ چې اغېزمن ګامونه به پورته شي.
