په ړنه او عادلانه بڼه د عایداتو پر را ټولونه د صنعت او سوداګرۍ وزارت ټېنګار
یکشنبه ۱۲ ربیع الاول ۱۴۴۶ / ۲۵ وږی ۱۴۰۳
د صنعت او سوداګرۍ وزارت د معین محترم مولوي احمد الله زاهد په مشرۍ د دې وزارت د سوداګریزو چارو، صنعتي پارکونو او صنایعو د چارو د عمومي رییسانو، د مالیې محترم وزارت د عوایدو د عمومي ریاست مرستیال او ځینو نورو رییسانو او د مالیې وزارت د تخنیکي ټیم په شتون کې د عوایدو راټولولو په برخه کې د ګډې همکارۍ او عوایدو د راټولولو او د عوایدو د راټولولو د څار لپاره د صنعت او سوداګرۍ په وزارت کې دګډ ټیم د جوړولو به تړاو د همکاریو د پیاوړتیا ګډه غونډه جوړه شوه.
پدې ناسته کې چې د سنبلې په ۲۵مه جوړه شوې وه، د دواړو ادارو تر مینځ د همکاریو پر پیاوړتیا، د دې وزارت د عاید راوړونکو سرچینو او د عوایدو د را ټولولو په لار کې د شته ستونزو او ننګونو په تړاو بحث او خبرې وشوې.
په یاده ناسته کې د صنعت او سوداګرۍ وزارت معین محترم مولوي احمد الله زاهد په عادلانه او رڼه بڼه د عوایدو پر راټولو ټینګار وکړ او ویې وویل: مونږ د هېواد د عوایدو د زیاتوالي لپاره پروګرامونه ترلاس لاندې لرو او د عوایدو د راټولو په لار کې به د مالیې د محترم وزارت له مشورو څخه ګټه اخلو او د دغه وزارت د پروګرامونو په پلي کولو کې به همکاري کوو.
ددې ناستې په پای کې د صنعت او سوداګرۍ وزارت له عوایدو راټولولو څخه د څار په موخه د یوه ګډ ټیم پر جوړولو موافقه وشوه.
