د کابل په پلچرخي صنعتي پارک کې د نيالګيو دکرلود پروسې پیل
چهارشنبه د کب 27مه 1399
د پل چرخي صنعتي پارک کې د نيالګيو دکرلو پروسه د صنعت او سوداګرۍ وزیر ښاغلي نثار احمد غوریاني ، د صنعت او کانونو د خونو عمومي رییس شيرباز کمين زاده، صنعتکارانو او دياد پارک د فابریکو مالکینو په حضورکې پیل شوه.
د صنعت او سوداګرۍ وزیر د دغو مراسمو په پیل کې وویل چې دهېواد زرغونتيا ، د ککړتیا مخنیوی او د چاپیریال ساتنه د ټولو اتباعو دنده ده.
ښاغلي غوریاني زیاته کړه چې خصوصي سکتور په ځانګړي توګه د فابریکو مالکین دنده لري چې د خپلو فابریکو په شنو ساحو کې نيالګي کينوي.
د صنعت او سوداګرۍ وزارت د زرغونتيا ، هوا د ککړتیا دمخنيوي او چاپیریال ساتنې په موخه له خصوصي سکتور سره په همکارۍ د هیواد په صنعتي پارکونو کې د 25،000 څخه ډیر نیالګي کښینوي چې عملي کار یې د پل چرخي صنعتي پارک څخه پیل شو.
داپه داسې حال کې ده چې ، د چاپیریال ساتنې ملي ادارې عمومي رییس شاه زمان میوندي په دې وروستیو کې د صنعت او سوداګرۍ له وزیر نثار احمد غوریاني سره وکتل او د چاپیریال ساتنې لپاره د نیالګیو په کښینولو کې د دې وزارت او خصوصي سکتور د همکارۍ غوښتنه وکړه. .
ښاغلي غوریاني هم ژمنه وکړه چې دغه وزارت به د خصوصي سکتور په همکارۍ په صنعتي پارکونو او د صنعتي فابريکو په چاپيريال کې شنې ساحې رامنځته کړي او دوی به له 25،000 څخه ډیر نیالګي کښینوي.
