له لسو مؤسسو سره د همکارۍ هوکړه لیکونه لاسلیک شول
دوشنبه مورخ 11 جمادی الثانی 1445 / 4 مرغومی 1402
د صنعت او سوداګرۍ وزارت له لس مؤسسو سره د ډيرو کوچنیو، منځنیو او کوچنیو تشبثاتو د ملاتړ او پراختیا په موخه هوکړه لیکونه لاسلیک کړل.
یاده غونډه کې د دې مؤسسو مسؤلینو په ټولنه کې د پروژو د څرنګوالي او د پروژو تر پوښښ لاندې وګړو په هکله معلومات وړاندې کړل.
د صنعت او سوداګرۍ وزارت سرپرست ښاغلي نورالدین عزیزي د یادو موسسو له خوا پر عملي فعالیتونو د ټینګار ترڅنګ مسؤلینو ته لارښوونه وکړه چې له اړوندو ادارو سره تماس ونیسي او معلومات دې ورکړل شي، چې له دې وروسته د تشبثاتو په برخه کې پروژې د خلکو د اساسي اړتیاوو سره سم په نظر کې ونیول شي.
په وینا يې په ولایتونو کې د مؤسساتو له خوا د پروژو د پلي کیدو تمرکز د کارموندنې په رامینځته کولو او د ولسونو لپاره پر دوامداره ګټو باندې ولاړ وي.
په پام کې ده چې یادې مؤسسې د صنعت او مسلک د بیا ژوندي کولو له لارې د معیشت د رامینځته کولو ، د افغانستان پراختیا او بیا ژوندي کولو، د نړۍ د خوراکي سیسټم د مقاومت د پیاوړتیا د بدیلومشورتي خدماتو، د کوچنیو او منځنیو متشبثینو لپاره د سوداګرۍ ملاتړ او بازارموندنې ته وده ورکولو، د کوچنیو پانګونو د ملاتړ، د ظرفیت لوړولو او کار موندنې له لارې د بې وزلو کورنیو پیاوړتیا، د کورنیو د اقتصادي پیاوړتیا، د نجونو،کونډو او بې وزله ښځو لپاره د ګنډلو زده کړه او لاسي صنایعو پراختیا، د غالۍ اوبدلو له لارې د بې وزلو ښځو لپاره د کار پیدا کولو او داسې نورې پروژې په کابل، سمنګان، سرپل، هرات، بغلان، بلخ او بدخشان کې پلي کړي.
