د صنعت او سوداګرۍ وزارت معین د بلخ ولایت له یو شمېر صنعتکارانو سره وکتل
جمعه 4 ذوالقعدة الحرام 1446 / 12 ثور 1404
نن د جمعې په ورځ له غرمې مخکې د صنعت او سوداګرۍ وزارت معین مولوي احمدالله زاهد، ور سره مل پلاوي او د بلخ ولایت د صنعت او سوداګرۍ ریاست رئیس د بلخ ولایت په صنعت او سوداګرۍ ریاست کې له یو شمېر صنعتکارانو سره وکتل.
غونډه د قرانکریم د مبارکو آیتونو په تلاوت سره پیل شوه، او وروسته ښاغلي زاهد صنعتکارانو ته په دې برخه کې د لا ډېري پانګوني توصیه وکړه. نوموړي زیاته کړه چې افغانستان هغه مهال اقتصادي پرمختګ کولی شي چې د مصرفي هېواد په ځای په یو صادراتي هېواد بدل شي، او دا هدف هغه وخت ترلاسه کېدای شي چې د صنعت په برخه کې پر مخ لاړ شو.
ښاغلي زاهد یادونه وکړه چې د امیرالمؤمنین حفظه الله د فرمان په اساس په بلخ ولایت کې شل زره جریبه صنعتي ځمکه منظوره شوې او په دغه ولایت کې کافي برېښنا هم موجوده ده. بناءً د بلخ ولایت د صنعتي پراختیا لپاره تر نورو ولایتونو غوره شرایط لري.
وروسته ښاغلي زاهد د صنعتکارانو ستونزې په غور سره واورېدې او ډاډ یې ورکړ چې د هغوی د ستونزو د حل لپاره به لازم اقدامات ترسره کړي. هغه زیاته کړه، کومې ستونزې چې د نورو ادارو اړوند دي، له اړوندو مراجعو سره به یې شریکې کړي.
په پای کې، صنعتکارانو د مولوي زاهد د ورتګ هرکلی وکړ، خپله خوښي یې څرګنده کړه او ژمنه یې وکړه چې د صنعت په پرمختګ کې به له هېڅ راز هڅو څخه دریغ ونه کړي.
