د زرګرانو د اتحادیې غړو او دسرو زرو سوداګرو سره لیدنه
شنبه مورخ 12شعبان المعظم 1444 / 14 کب 1401
د صنعت او سوداګرۍ وزارت مرستیال ښاغلي الحاج مولوی قدرت الله جمال نن په خپل کاري دفتر کې د زرګرانو د اتحادیې غړو او دسرو زرو سوداګرو سره وکتل.
په دې لیدنه کې سوداګرو د سرو زرو د پېر، پلور، صادراتو او ترانزیټ په برخه کې خپلې ستونزې د صنعت او سوداګرۍ وزارت له مرستیال ښاغلي الحاج مولوي قدرت الله جمال سره شریکې کړې او د ستونزو د حل غوښتنه يې وکړل.
د صنعت او سوداګرۍ وزارت مرستیال ښاغلي الحاج مولوي قدرت الله جمال د سرو زرو سوداګرو د ستونزو او وړاندیزونو په اورېدلو سره وویل، هیوادونه د صنعت او سوداګرۍ له لارې پر مختګ کوي او صنعت او سوداګرۍ یې د هیواد د ځان بسیاینې او پرمختګ بنسټ وباله.
همداراز ښاغلي جمال وویل د صنعت اوسوداګرۍ وزارت مشرتابه تل هڅه کوي چې صنعت کارانو او سوداګرو ته آسانتیاوې رامنځته کړئ، زیاته يې کړه چې تاسو به د وزارت د تخنیکي ټیم په همغږي د سرو زرو د صادراتو او ترانزیټ په برخه کې پر نوي او مفصله طرحه کار وکړئ، او یاده طرحه به د اقتصادي کمیسیون سره شریک کړو تر څو ستاسي ستونزي د صادراتو او ترانزیټ په برخه کې حل شي.
