د افغانستان، ګاونډیو او سیمې هېوادونو تر مینځ د سوداګرۍ او ترانزیت په اړه مشورتي ناسته جوړه شوه
شنبه ۱۱ ربیع الاول ۱۴۴۶ / ۲۴ وږی ۱۴۰۳
د افغانستان، ګاونډیو او سیمې د هېوادونو تر مینځ د سودا ګرۍ او ترانزیت په اړه د افغانستان د اسلامي امارت د صنعت او سوداګرۍ د سرپرست وزیر ښاغلي الحاج نورالدین عزیزي په مشرۍ او د یاد وزارت د معین محترم مولوي احمدالله زاهد، د خصوصي سکتور د مشرانو او د سکتوري خونو د غړیو په ګډون یوه پراخه مشورتي ناسته د یاد وزارت د غونډو تالار کې وړه شوه.
په یاده ناسته کې چې د سنبلې په ۲۲ مه ترسره شوه، د پاکستان اسلامي جمهوریت له لارې هندوستان ته د افغانستان پر صادراتي توکیو د دوه سلنې تعرفې لګول، د افغانستان او پاکستان د سوداګریزو اړیکو د ښه کېدو په اړه د افغان-پاک د ګډې سوداګریزې خونې ونډه او پدې تړاو د اساسي او بنسټیزو حل لارو د موموندلو لپاره د یوې ګډې کمېټې جوړول، د تورخم کرښې ها خوا قبایلو سره د دوه سلنه تعرفې په تړاو د خبرو اترو لپاره د خصوصي سکتور د یوې کمیټې جوړول، وڅېړل شول او په تړاو یې خبرې وشوې.
همدارنګه پدې ناسته کې پر وارداتي میوو د ګمرکي تعرفې لوړولو په تړاو د سکتوري خونو له غړیو سره مشوره تر سره او په اړه یې د نظر غوښتنه وشوه.
د ناستې ګډونوالو د یادو موضوعاتو په تړاو خپل نظریات او تخنیکي وړاندیزونه د وزارت له مشرتابه پلاوي سره شریک کړل.
