د جوزجان ولایت له صنعت کارانو سره ناسته
پنج شنبه مورخ 28شوالالمکرم 1444 / 28 غويي ۱۴۰۲
د صنعت او سوداګرۍ وزارت مرستیال او سرپرست ښاغلي الحاج مولوي قدرت الله جمال د جوزجان ولایت سوداګرو او صنعت کارانو سره وکتل.
ګډونوالو د صنعت د ودې او پراختیا د فابریکو خاوندانو ته د آسانتیاوو برابرولو په برخه کې د افغانستان اسلامي امارت او په ځانګړې توګه د صنعت او سوداګرۍ وزارت د رهبرۍ له پاملرنې څخه مننه وکړه او په جوزجان ولایت کې د صنعت په وړاندې د شته ننګونو او فرصتونو په اړه معلومات ورکړل.
وویل چې جوزجان ولایت د غالیو د صنعت مرکز دی، دوی وړاندیز وکړ چې د دغه صنعت او د نورو تولیداتو او محصولاتو د لا پراختیا لپاره اړتیا ده چې د جوزجان ولایت د قرقین ولسوالۍ د کلفت بندر چې د ترکمنستان او افغانستان تر منځ پر پوله پروت دی، بیرته فعال شي د دوی په وینا، د دغه بندر پرانیستل په داسې حال کې چې له ترکمنستان او منځنۍ آسیا له هیوادونو سره د ۳۰۰ کیلو متره سوداګریزې لارې د نږدې کیدو لامل کیږي، د صنعت او سوداګرۍ د ودې په برخه کې هم ګټور تمامېدای شي.
همداراز د غونډې ګډونوالو له ترکمنستان څځه د ګازو دپېرلو، د صنعتي پارک د جوړولو او په جوزجان ولایت کې د ثقیله صنایعو د فعالیدو په اړه هم خبرې وکړې
ښاغلي الحاج مولوي قدرت الله جمال د دوی څخه مننه وکړه او ویې وویل چې د نصوصو او احادیثو له مخې کاسب د الله ج حبیب او دوست دي، په همدې اساس د افغانستان اسلامي امارت د هیواد صنعت کارانو او سوداګرو ته اقتصادي مجاهدین بللي دي.
ښاغلي جمال یادونه وکړه چې د صنعت او سوداګرۍ وزارت مشرتابه تل د خصوصي سکتوړ له غړو سره سلا مشورې کوي، له همدې امله د تجربو پر بنسټ دا غوره ده چې ټولې غوښتنې د عملي کیدو لپاره باید له وزارت سره شریک او د یو او بل په مرسته کارونه تعقیب کړو.