د صنعت او سوداګرۍ سرپرست وزیر د چین له سفیر سره ولیدل
سه شنبه مورخ ۲۱ جمادی الاول ۱۴۴۵ / ۱۴ لیندی ۱۴۰۲
د صنعت او سوداګرۍ سرپرست وزیر الحاج نورالدین عزیزي د چین ولسي جمهوریت له سفیر ښاغلي جاوشینگ سره پخپل کاري دفتر کې ولیدل.
ښاغلي عزیزي چین ته د سفر او ښې مېلمه پالنې له امله مننه وکړه او په وینا يې د دواړو هېوادونو تر منځ باید د سوداګریزو اړیکو په برخه کې لا پیاوړتیا را منځته شي.
ښاغلي جاوشینګ د خوښي څرګندولو او مننې تر څنګ وویل، چې د وچو مېو د پروسس په برخه کې به چینايي شرکتونه هڅه وکړي چې دلته پانګونه وکړي.
دواړو لورو د سوداګریزو مواصلاتي لارو او ترانزیټ په برخه کې نظرونه تبادله کړل او د همکارۍ ژمنې يې وکړې.
