د جلغوزې د تولید، پروسس او صادراتو سکتور لپاره یوه واحده اتحادیه جوړیږي

شنبه ۲ شعبان المعظم ۱۴۴۶ / ۱۳ سلواغه ۱۴۰۳

د ا.ا.ا. د صنعت او سوداګرۍ وزارت سرپرست محترم الحاج نورالدین عزیزي په هېواد کې د جلغوزې د تولید او صادراتو سکتور له غړیو څخه د ملاتړ، د دې سکتور د لا ښه مدیریت او د دې سکتور د غړیو تر مینځ د ناسالم رقابت له مینځه وړلو په موخه نن د خپل کار په دفتر کې د جلغوزې د سکتور له سوداګرو سره وکتل.

پدې لیدنه کې د جلغوزې د پروسس د فابریکو پر جوړولو ټینګار وشو او د جلغوزې پر صادراتو، د دې سکتور له غړیو څخه پر ملاتړ او په هېواد کې د جلغوزې د مارکیټ پر جوړولو بحث ترسره شو او پر دې سربېره د جلغوزې د سوداګرو ستونزې واوریدل شوې.

د صنعت او سوداګرۍ وزارت سرپرست د دوی د خبرو په اوریدو سره، له دوی څخه د یاد وزارت بشپړ ملاتړ اعلان کړ او څرګنده یې کړه چې د دې سکتور د سوداګرو تر مینځ دې نا سالمه رقابت ژر تر ژره پای ومومي او ټول سوداګر دې په یوه واحده اتحادیه کې سره را ټول شي.

د دې سکتور د سوداګرو په وینا، اوس د افغانستان جلغوزي، چین، هند او ځینو اروپایي هېوادونو ته صادریږي.