د درملو د تولید د لویو ایراني شرکتونو له چارواکو سره د صنعت او سوداګرۍ وزارت د سرپرست لیدنه
شنبه ۴ ربیع الاول ۱۴۴۶ / ۱۷ وږی ۱۴۰۳
د افغانستان د اسلامي امارت د صنعت او سوداګرۍ وزارت سرپرست محترم الحاج نورالدین عزیزي نن شنبه د سنبلې( وږي) په اوومه نېټه، د خپل کار په دفتر کې د درملو د تولید د لویو ایراني شرکتونو له چارواکو سره لیدنه وکړه.
پدې لیدنه کې د افغانستان د اسلامي امارت د صنعت او سوداګرۍ وزارت سرپرست، د ایران د درملو تولید سترو شرکتونو له چارواکو سره، افغانستان ته د با کیفیته درملو د واردولو او د بې کیفیته او تقلبي درملو راتلو د مخنیوي پر لارو چارو خبرې وکړي. پدې لیدنه کې همدا رنګه د درملو د تولید د ایراني شرکتونو مسوولینو په افغانستان کې د خپلو شرکتونو د څانګو پرانیستلو او دلته د خامو کیمیاوي موادو تولید ته تیاري وښوده.
د صنعت او سوداګرۍ وزارت سرپرست الحاج عزیزي، افغانستان ته د واردتي درملو پر کیفیت او قیمت پر ټینګار سره د دوی پروګرامونو ته هرکلی ووایه او زیاته یې کړه چې افغانستان ته د با کیفیته درملو پر وارداتو کوم محدودیت او بندیز نشته او له دغه ایراني پلاوي څخه یې وغوښتل تر څو په افغانستان کې پانګونه وکړي.
