د سرپل ولایت امنیه قومندان د سوداګرۍ وزارت له مرستیال سره وکتل
سه شنبه ۳۰ ربیع الثانی ۱۴۴۵ / ۲۳ لړم ۱۴۰۲
د سرپل ولایت امنیه قومندان مولوي عبدالبصیر مظهري د صنعت او سوداګرۍ وزارت له مرستیال مولوي قدرت الله جمال سره نن غرمه مهال وکتل.
ناسته کې ښاغلي مظهري له امنیتي پلوه د سرپل په سوداګریز وضعیت خبرې وکړې او هلته یې د سوداګرو او سوداګریزو فعالیتونو د خوندیتوب ډاډ څرګند کړ. نوموړي د صنعتکارانو ته د تجارتي پاسپورټونو د ورکړې موضوع هم د وزارت له مشرتابه سره شریکه کړه.
د صنعت او سوداګرۍ وزارت مرستیال ښاغلي جمال د خپلو خبرو په ترڅ کې د سوداګریزو فعالیتونو د پراختیا او اغېزمنتیا لپاره د دخیلو اداراتو په همکاري ټینګار وکړ او د صنعتي بهیر ملاتړ یې د ټولو اداراتو ملي او افغاني مسؤلیت وباله. په وینا یې سوداګرۍ وزارت په هیواد کې د سوداګرۍ او صنعتونو لپاره د بېساري او غوره ګامونو پورته کولو ته ژمن دی.
