د قزاقستان هېواد ته د افغانستان د دولتي او خصوصي سکتور د استازو ګډ سفر
جمعه ۱۵ ربیع الثانی ۱۴۴۶ / ۲۷ تله ۱۴۰۳
د ا.ا.ا.د صنعت او سوداګرۍ وزارت سرپرست محترم الحاج نورالدین عزیزي د یوه پلاوي په مشرۍ چې د خصوصي او دولتي سکتور استازي پکې ګډون لري، پرون جمعه د ۱۴۰۳ لمریز کال د تلې (میزان) په ۲۷مه، د قزاقستان هېواد الماتا ښار ته سفر وکړ.
د الماتا ښار ته د افغانستان د دولتي او خصوصي سکتور د ګډ پلاوي د سفر موخه، په دغه ښار کې د افغانستان د تولیداتو او محصولاتو د نندارتون جوړول، د سوداګریزې راکړې ورکړې په کنفرانس کې ګډون ، د قزاقستان هېواد له چارواکو سره رسمي ناستې او غونډې جوړول او هلته په نورو رسمي ناستو کې ګډون دی.
د یادونې وړ ده چې پدې سفر کې له محترم الحاج عزیزی سره ۲۵۰ تنه ملګري دي چې د کانونو او پترولیمو وزارت معین، د چارو د ادارې د لوی ریاست اړوند د پانګونې د آسانتا رییس،د بهرنیو چارو وزارت ، د افغانستان بانک او د کابینې د اقتصادي معاونیت استازي پکې ګډون لري.
