له ملي سوداګرو سره مشورتي ناسته
۱۳۹۹ کال د تلې ۲۲مه
د صنعت او سوداګرۍ وزارت سرپرست او نوماند وزیر ښاغلي نثار احمد غوریاني په مشرۍ له ملي سوداګرو سره مشورتي ناسته ترسره شوه په دغه غونډه کې د افغانستان د صنعت او سوداګرۍ فدراسیون مرستیال ښاغلي خان جان الکوزي، په سوداګرۍ نړیوال سازمان کې د افغانستان دایمي استازي ښاغلي محمد قربان حقجو، ملي سوداګرو او د دې وزارت رئیسانو ګډون کړی وو،یاده غونډه د وزارت د مقام د غونډو په تالار کې ترسره شوه.
په دې غونډه کې پاکستان اسلامي جمهوریت ته په نږ دې راتلونکې کې د افغانستان د لوړ رتبه پلاوي سفر په هکله خبرې اترې ترسره شوې.
ښاغلي غوریاني له ملي سوداګرو څخه وغوښتل چې د ددې وزارت لخوا د جوړې شوې مسودې د لا بډاینې لپاره دې خپل نظریات او وړاندیزونه شریک کړي، ترڅو له پاکستان سره د هیواد ترانزیټي او سوداګریزې ستونزې په اساسي ډول حل شي.
ښاغلي خان جان الکوزي او د غونډې ګډونوالو په دې هکله د عملي همکارۍ ډاډ ورکړ.
په پام کې ده چې دافغانستان پلاوی د یو لړاصلاحي وړاندیزونو،او طرحو سره پاکستان ته سفر وکړي اوهلته به په سوداګریزو او ترانزیتي ستونزو او دهغې په بنیادي حل لاره د هغه هیواد له مقاماتو سره بحث وکړي.
