په هېواد کې دفابریکو په وړاندې دپرتو ستونزو دهوارۍ او دخنډونو لیرې کول دصنعت او سوداګرۍ وزارت په لومړیتوبونو کې دي

۲۸/۳/۱۳۹۹
دصنعت او سوداګرۍ وزارت دسوداګرۍ معین ښاغلي عبدالکریم ملکیار،دافغانستان دصنایعو دټولنې رییس ښاغلي عبدالجبار صافي ، له یو شمیر فابریکه لرونکو سره په یوه غونډه کې دفاریکو دخاوندانو په ستونزو بحث وکړ۰
په دغه غونډه کې ښاغلي عبدالکریم ملکیار وویل چې دصنایعو دسکتور ، هڅونه ، ملاتړ اوهغې ته پاملرنه دصنعت او سوداګرۍ وزارت په لومړیتوبونو کې دي، هغه زیاته کړه چې ددې سکتور په وړاندې دپرتو خنډونو لیرې کول کولای شي چې هېواد له لګښتي او وارداتي اقتصاد څخه وباسي.

ښاغلي ملکیار داهم وویل چې دصنعت او سوداګرۍ وزارت لید لوری هم دادی چې افغانستان له یوه وارداتي هېواد څخه په صادراتي هېواد بدل کړي، دهغه په وینا دې موخې ته هغه وخت رسېدلای شو چې په هېواد کې دصنایعو سکتور وده او پراختیا وکړي ۰

وروسته ښاغلي عبدالجبار صافي او فابریکه لرونکو خپلې ستونزې څرګندې کړې او زیاته یې کړه چې دبریښنا کموالی، دورکشاپونو نه ترمیم، دماشینرۍ نه رغېدنه، دروغتیایي کلینیکونو نشتوالی، دچاپیریال ساتنې په برخه کې ستونزې او دځمکو دکرایو په برخه کې خنډونه، هغه ستونزې دي چې فابریکه لرونکي ورسره لاس او ګریوان دي ۰

په پای کې پریکړه وشوه چې دصنعت اوسوداګرۍ وزارت تخنیکي کمیټه دې په مطرح شویو موضوعاتو ، منظمې غونډې ونیسي او خپل وړاندیزونه او طرحې ترتیب کړي ، تر څو دمنظورۍ لپاره دهېواد عالي اقتصادي شورا ته وړاندې شي