کابل کې د سیروم جوړونې ستره فابریکه پرانیستل شوه

دوشنبه مورخ ۱۶ ربیع الاول ۱۴۴۵ / ۱۰ تله ۱۴۴۵

د کابل په پل چرخي صنعتي پارک کې د سیروم جوړولو یوه ستره او معیاري فابریکه پرانیستل شوه. د پرانیستې په مراسمو کې د یو شمېر نورو لوړ رتبه امارتي چارواکو تر څنګه د صنعت او سوداګرۍ وزارت مرستیال مولوي قدرت الله جمال هم ګډون درلود.

نوموړي په خپلو څرګندونو کې دټي جي ایل فارماسیټیکل په جوړېدو خوښي څرګنده اود فابریکې له څښتن یې مننه وکړه، ښاغلي جمال زیاته کړه چې خصوصي سکتور دهیواد په اقتصادي پرمختګ کې رغنده رول لوبولی او د سلګونو هیوادوالو لپاره یې کاري زمینه رامنځته کړې ده.

په وینا یې افغانان باید له داخلي تولیداتو استفاده وکړي،صنعتکارانو ته دځمکو وېش او برېښنا دکمښت دستونزو اړوند ښاغلي جمال ډاډ ورکړ چې په نزدې وخت کې به ددې ستونزو لپاره مناسب حل پیدا شي.

په پای کې دنورو چارواکو په ملتیا د سوداګرۍ وزارت مرستیال دفابریکې له بېلابېلو برخو لیدنه وکړه.

د یادونې وړ ده چې ټي جي ایل فابریکه د ۲۵ میلیونه امریکایي ډالرو په لګښت رامنځته شوې چې په ۲۴ ساعتونو کې د ۱۱۰زره سیرومونو د تولید وړتیا لري. په فابریکه کې له ۱۰۰۰ څخه زیاتو کسانو ته د کار زمینه برابره شوې.