د افغانستان د صنعت او سوداګرۍ وزارت معین مولوي احمدالله زاهد د چین هیواد د ګمرکونو د عمومي ادارې له مرستیال سره و کتل
شنبه ۲۶ ذوالقعدةالحرام ۱۴۴۶ / ۳ جوزا ۱۴۰۴
تیره ورځ د افغانستان د صنعت او سوداګرۍ وزارت مرستیال، ښاغلي احمدالله زاهد، د چین د ګمرکاتو د عمومي ادارې له مرستیال سره رسمي کتنه ترسره کړه. دغه ناسته د دواړو هېوادونو ترمنځ د سوداګریزو، ترانزیټي، او زراعتي همکاریو د پراخوالي په موخه جوړه شوې وه.
د چین د ګمرکاتو مرستیال د ښاغلي زاهد او ورسره مل پلاوي هرکلی وکړ او د افغانستان او چین د ښو اقتصادي اړیکو ستاینه یې وکړه او څرګنده یې کړه چې افغانستان د صادراتو په برخه کې ستر پتانسیل لري. هغه زیاته کړه چې چین د افغانستان د صادراتي توکو پر ګمرکي تعرفو معافیت ورکړی دی او د دواړو هېوادونو ترمنځ د متقابل تجارت د پراخوالي لپاره ښه فرصتونه شته. نوموړي یادونه وکړه چې که څه هم د چین قرنطیني معیارونه سخت دي، خو د دغو معیارونو په پوره کولو کې د افغانستان سره همکارۍ ته چمتو دي.
ښاغلي احمدالله زاهد د چینایي لوري د همکاریو څخه مننه وکړه او زیاته یې کړه چې:
1. د افغان صادراتو پر ځینو توکو د چین په بازار کې لګیدونکي VAT چې اوس مهال ۹٪ او ۱۳٪ دی، دې تخفیف ورکړل شي ترڅو افغاني صادرات په بازار کې رقابت و کړای شي.2. د افغانستان او چین ترمنځ دې د یوې عمومي زراعتي تفاهمنامې د لاسلیک پروسه ګړندۍ شي، او تر هغې مخکې دې د افغانستان وچې میوې، طبي بوټي، زعفران، او تازه میوې په ځانګړي ډول انار، د چین له قرنطیني معیارونو څخه معاف شي.
3. افغان موټر دې د قرغیزستان او قزاقستان له لارې د چین خاورې ته د داخلېدو اجازه ترلاسه کړي، او همدارنګه دې افغان هوايي شرکتونو ته د ارومچي سربېره نورو چینایي ښارونو ته د پرواز اجازه ورکړل شي.
د چین د ګمرکاتو ادارې مرستیال ډاډ ورکړ چې یاد شوي وړاندیزونه به د دیپلوماتیکو مراحلو له لارې وڅېړل شي او د امکان تر حده به په کې لازمې همکارۍ وشي. هغه ژمنه وکړه چې چین به د افغانستان د صادراتو، زراعتي همکاریو، او ترانزیټي اسانتیاوو په برخه کې دوامدارې مرستې و کړي.
