جمهوررئیس غني د اوزبیکي ژبې ملې ورځې د نمانځنې مراسمو کې: اوزبیکي د ارتباط او وصل ژبه ده
د افغانستان د اسلامي جمهوریت جمهوررئیس محمد اشرف غني د اوزبیکي ژبې ملي ورځې (د تلې ۲۹) د نمانځنې په مراسمو کې نن له غرمې مخکې په سلامخانې ماڼۍ کې ګډون او وینا وکړه.
په دغو مراسمو کې چې د جمهوري ریاست لومړي مرستیال امرالله صالح، د مشرانو جرګې رئیس فضل الهادي مسلمیار، د کابینې او ملي شورا یو شمېر غړو، د اوزبیکستان د لومړي وزیر مرستیال، د هیواد پوهانو، لیکوالو او څېړونکو حضور درلود، په پیل کې استاد عزیزالله ارال له جمهوررئیس غني څخه د اوزبیکي ژبې د ملي ورځې (د تلې ۲۹) د نومولو او په کالیز کې د درج کولو له امله مننه وکړه او ټولو ته یې د دغې ورځې مبارکي وویله.
نوموړي د ژبو ارزښت او هراړخیز استعمال ته په اشارې وړاندیز وکړ چې پوهنې وزارت دې د اوزبیکي ژبې د کتابونوچاپ او وېش، لوړو زده کړو وزارت دې له اوزبیکستان څخه د یو شمېر راستنو شویو محصلینو د اسنادو اجرا او هوایي او مخابراتي شرکتونه دې په اوزبیکي ژبه اعلانونو او تبلیغاتو ته پاملرنه وکړي .
ورپسې د اوزبیکستان د لومړي وزیر مرستیال سردار اوکتامو ویچ عمرزاکوف د جمهوررئیس شوکت میرضیایف پیغام ولوست. یاد پیغام جمهوررئیس ته په خطاب کې ویل، د زړه له کومې تاسو او ټولو ګډونوالو ته ستاسو جلالتماب د حکم په اساس د اوزبیکي ژبې ملي ورځې د نمانځنې مبارکي وایم او تود هرکلی یې کوم.
د اوزبیکستان جمهوررئیس په خپل پیغام کې لیکلي و، موږ په ۲۰۱۸ کال کې د اوزبیکستان ترمز ښار کې ۲۰۰ افغان محصلینو ته د اوزبیکي ژبې او ادبیاتو او اورګاډي پټلۍ او نورو برخو کې د تحصیل زمینه برابره کړه او دا دوامدار پروګرام دی.
په یاد پیغام کې راغلي و، اوزبیکستان دولت د امنیت، سولې، سوداګرۍ او اقتصاد په برخو کې د افغانستان حکومت سره هراړخیزه همکاري کوي او موږ په دې برخه کې د افغانستان حکومت زیات ملاتړ ته ژمن یوو. همدارنګه د اوزبیکستان دولت په افغانستان کې د امنیت د تامین او د حکومت د انکشافي برنامو هراړخیز ملاتړ کوي.
جمهوررئیس غني دغو مراسمو ته په وینا کې ټولو ته د اوزبیکي ژبې د ملي ورځې مبارکي پرمهال وویل، نن زموږ موخه د اساسي قانون د ۱۶ مادې تطبیق دی او قانون د افغانستان د ټولو ژبو په اړه بشپړ وضاحت لري.
د هیواد جمهوررئیس وویل، د ویاړ ځای دی چې د اوزبیکستان جمهوررئیس شوکت میرضیایف نه یوازې خپل پیغام رالېږلی، بلکې استازی یې هم دلته حضور لري. له سل کاله لیرې والي او د سټالین د دوران له فاجعې وروسته نن افغانستان او اوزبیکستان یوځل بیا نه جلا کېدونکې اړیکې لري او دغه دوستي دې تلپاتې وي.
محمداشرف غني د افغانستان او منځنۍ اسیا هیوادونو تاریخي او فرهنګي اړیکو ته په اشارې وویل، زموږ اړیکې او مناسبات ورځ تر بلې پیاوړي کېږي او دا د منځنۍ اسیا او د افغانستان د ولسونو د ثبات او سوکالۍ لپاره زیات ارزښت لري.
هغه زیاته کړه. اوزبیکي زموږ د ارتباط او وصل ژبه ده او افغانستان ډېر نېکمرغه دی چې زموږ هره ژبه د وصل ژبه ده او څومره چې د دغو ژبو په اړه د هر افغان پوهه زیاتېږي، نو همغومره ورسره ملي یووالی اوسیمه ییزې اړیکې پیاوړې کېږي.
د هیواد جمهوررئیس د هلمند او غور خلکو ته یو وار بیا د وروستیو پېښو د شهیدانو تسلیت ووایه او زیاته یې کړه، موږ د ثبات، همغږۍ او یووالي استازیتوب کوو، فکر مو روښانه، زړونه مو پاک او راتلونکي محوره یوو او میراثي تاوتریخوالی پایته رسوو. دغه تاوتریخوالي ته دوام ورکوونکي د خدای او ولس پر وړاندې مسوول دي.
جمهوررئیس د دغو مراسمو له جوړونکو څخه په مننې وویل، د نمانځلو ترڅنګ باید د خپل عظیم فرهنګ ژورې رېښې درک او ګټور اثار تالیف کړو. هغه زیاته کړه، په ځوانانو کې امیرعلي شېرنوایي او ښځوکې ګوهرشاد بېګم غواړم.
