د صنعت او سوداګرۍ وزارت مرستیال ارزګان ولایت ته سفر ترسره کړ
سه شنبه مورخ 8 ربیع الثانی ۱۴۴۵ / ۲ لړم ۱۴۰۲
د صنعت او سوداګرۍ وزارت مرستیال مولوي قدرت الله جمال ارزګان ولایت ته یو ورځنی سفر ترسره کړ.
نوموړي د سفر په ترڅ کې د ارزګان له والي مولوي محمد علي جان سره په ولایت مقام کې ولیدل. په دې لیدنه کې د یاد ولایت د سوداګریز وضعیت د ارزونې تر څنګ د سوداګرۍ وزارت له خوا سوداګرو ته په رامنځته شوو اسانتیاوو خبرې اترې وشوې. ښاغلي جمال زیاته کړه چې سوداګرۍ وزارت د هیواد د ټولو ولایتونو سوداګریز پرمختګ ته ژمن دی او هڅه کوي چې سوداګرو لپاره د فعالیت خوندي او متوازن چاپېریال رامنځته کړي. په وینا یې په همدې موخه ولایتي آمریتونه د ریاست درجې ته لوړ شوي او نن د ارزګان ولایت د سوداګرۍ آمریت د ریاست بڼه غوره کوي.
د وزارت مرستیال مولوي قدرت الله جمال د ارزګان د صنعت او سوداګرۍ ریاست پرانیسته وکړه او مولوي محمد شاهین یې د همدې ولایت د صنعت او سوداګرۍ ریاست د رئیس په صفت معرفي کړ.
