د صنعتي او تولیدي فابريکو د ثبت سیستم پرانیستل شو

یک شنبه مورخ 11 رمضان المبارک 1444 / 13 وری 1401

د کورنیو تولیداتو او د هېواد د صنعت د ملاتړ په موخه د صنعت او سوداګرۍ وزارت سر پرست ښاغلي الحاج نورالدین عزیزی تر مشرۍ او د سوداګرۍ او پانګونې خونې سرپرست ښاغلي محمد یونس مهمند، د سوداګرۍ خونې د مدیره هئیت غړو ښاغلي خان جان الکوزی، ښاغلي خیرالدین مایل، ښاغلي اچکزی، د صنایعو او کانونو خونې مشر ښاغلي شیرباز کمین زاده او د دې خونې د مدیره هئیت غړو ښاغلي ظریف ګل او خالد دانش د کرنې او مالدارۍ خونې مشر ښاغلي خان محمد فروتن، او د دې خونې د مدیره هئیت غرو ښاغلي میرویس حاجی زاده، ښاغلي اختر احمدی، ښاغلي صاحب حکیم جان او ښاغلي انجنیر قاسم د صنعت او سوداګرۍ وزارت د صنعتي پارکونو عمومي ریاست رئیس ښاغلي سید محمد نعیم محمدی، او د صنعت او سوداګرۍ وزارت د نړیوالې سوداګرۍ ریاست عمومی رئیس ښاغلي قاری محمد زبیر دین پرور په ګډون غونډه کې د صنعتي او تولیدي فابریکو د ثبت سیستم پرانيستل شو .

الحاج عزیزي د فابریکو د معلوماتو د ثبت په برخه کې د شرکتونو او مؤسسو د غوښتنې په اړه خبرې وکړې او ویې ویل چې د کورنیو تولیداتو د ملاتړ او دباور وړ او معیاري شرکتونو د توپیر په موخه مو د دوی غوښتنه ومنله، هغه ټینګار وکړ چې د هیواد د تولیداتو په برخه کې د نړیوالو نورمونو او معیارونو په نظر کې نیولو سره معیاري کېدو او سالمې سیالۍ ته اړتیا ده او دا سیستم د آسانتیا د رامنځته کولو په موخه ده همداراز د دې وزارت په هر فعالیت کې به د خصوصي سکټور نظر واخیستل شي.

د صنعت او سوداګرۍ وزارت سرپرست زیاته کړه، په یو شمېر سکتورونو کې تولیدي فابریکي په کافي اندازه فعالیت کوي، خو په نورو برخو کې لکه د نساجۍ صنعت چې د هیواد اساسي اړتیا ده، جدي پانګونې ته اړتیا لري.

همداراز د تکنالوژۍ او معلوماتی، او د ثقیله صنایعو رئیسانو د سیسټم د جوړولو، د معلوماتو راټولولو، په سیسټم کې د اړتیاوو د ارزونې او د معلوماتو د جلا کولو، په سیسټم کې د فابریکو د ثبت پروسې، د آسانتیاوو رامنځته کولو، او د هغو شرکتونو د پیژندلو په اړه خبرې وکړې چې د دې سیسټم له لارې پانګونې او د تعرفو فرصتونو ته اړتیا لري.

د غونډې ګډونوالو د دغه سیسټم له پیل څخه د ملاتړ تر څنګ مننه وکړه، او د دغه سیسټم په اهمیت او تجربو يې خبرې وکړې او دا یې د الکترونیکي حکومتولۍ او دشرکتونو په چارو کې د روڼتیا راوستلو په برخه کې يو ښه پیل وباله.

په پای کې ګډونوالو د صنعتي او تولیدي فابریکو د ثبت سیسټم په عملي بڼه ولیدل او یاد سیسټم د ګډونوالو په شتون کې پرانیستل شوه

د یادونې وړ ده چې د فابریکو د معلوماتو د ثبتولو په برخه کې د همکارۍ په موخه لارښود او ویډیو ( په راتلونکي کې) او د اړیکو شمیرې به د فابریکو له مسؤلینو سره شریکې شي.