دسریلانکا له سفیر سره دصنعت او سوداګرۍ وزارت دوزیر لیدنه

چهارشنبه : دسلواغې لومړۍ ۱۳۹۹

دصنعت او سوداګرۍ وزیر ښاغلي نثار احمد غوریاني دخپل کار په دفتر کې په کابل کې میشت دسریلانکا هېواد له سفیر ښاغلي ادمیرال کاری یاوسام کلاپاتا ویتانگی پیال هریش چاندرا دی سلوا سره وکتل او له نوموړي سره یې دسوداګریزو او اقتصادي اړیکو پر پراختیا خبرې وکړې.

په دغه لیدنه کې همداراز دافغانستان ـ سریلانکا ترمنځ دترانزیټي همکاریو پر پراختیا ، له لویدځې آسیاهېوادونو سره پرسوداګریزه راکړه ورکړه او دکابل ـ کلمبو تر منځ دهوایي دهلیز پر رامنځته کولو هم خبرې اترې وشوې.

ښاغلي غوریاني دسریلانکا او افغانستان تر منځ پخوانیو اړیکو ته په اشارې سره وویل چې دکابل ـ کلمبو تر منځ سوداګریزې اړیکې باید پراخې شي او هغه سوداګریزه هوکړه چې ددواړو هېوادونو ترمنځ چمتو شوې ده باید ژر تر ژره لاسلیک شي.

دصنعت او سوداګرۍ وزیر همدا راز دسریلانکا له سفیر څخه وغوښتل چې سریلانایي پانګوال دې ته وهڅوي چې په افغانستان کې په بېلابېلو سکتورونو کې پانګونه وکړي.

بلخوا بیا دسریلانکا سفیر له افغانستان سره دښو سیاسیي اړیکو په درلو دلو سره وویل چې هېواد یې له افغانستان سره دښو او پراخو سوداګریزو اړیکو غوښتونکی دی او سفارت به یې د افغانستان دتولیدي محصولاتو لپاره په هغه هېواد کې دخرڅلاو زمینه برابره کړي.

ددې ناستې په پای کې دواړو لورو ددواړو هېوادونو راتلونکې سوداګریزې اړیکې مهمې وبللې او ژمنه یې وکړه چې دسوداګریزو راکړو ورکړو په اړه به له یو بل سره همکاري کوي.