د تاجیکستان جمهوريت د صنايعو او نوې ټکنالوژۍ له وزير سره ليدنه
یکشبه: دغبرګولي۱۶مه ۱۴۰۰
دافغانستان د اسلامي جمهوری دولت د صنعت او سوداګرۍ وزیر ښاغلي نثاراحمد غوریاني او ورسره مل پلاوي يې د تاجیکستان جمهوريت د صنایعو او نوې ټکنالوژۍ له وزیرښاغلي شیرعلی کبیر سره وکتل او د دواړو هیوادونو ترمنځ د صنعت،سوداګرۍ او ترانزیټ د پرمختیا لپاره يې په ګډې همکارۍ خبري وکړې.
د صنعت او سوداګرۍ وزیر ښاغلي نثار احمد غوریاني د ښاغلي شیر علي کبیر د میلمه پالنې او بلنې څخه د مننې پرمهال د دواړو هیوادونو اړیکې اوږد مهاله او دوستانه وبللې او زیاته یې کړه چې د دې دواړو هیوادونو تاریخ په ملګرتیا،صداقت او صمیمیت ولاړ دی .
ښاغلي غوریاني په افغانستان کې د صنعت پرمختګ او د صنعتي فابریکو زیاتوالي په اړه د تاجیکستان جمهوریت د صنعت او نوي ټکنالوژی وزیر ته معلومات ورکړل او څرګنده یې کړه چې هیواد یې د صنعت په برخه کې د تاجک صنعتکارانو او پانګوالو سره د ګډ فعالیت ترسره کولو لپاره چمتو والي لری.
په دې کتنه کې د دوه اړخیزې سوداګرۍ د ودې لپاره د یوي رڼې ځانګړي کړنلاري ، د داړو هیوادونو د صنعتکارانو او سوداګرو ستونزو حلولو لپاره د هغوې د پلي کیدو په میکانیزم باندې هم خبرې وشوې.
د تاجیکستان جمهوريت د صنايعو او نوې ټکنالوژۍ وزير ښاغلي شيرعلي کبير د افغانستان د صنعت او سوداګرۍ وزير او ورسره مل پلاوي ليدنه په سوداګريزو اړيکو کې د مثبت بدلون او دواړوهیوادونو تر منځ د همکارۍ زياتوالي سبب وبلله.
د غونډې په پای کې ، دواړو لوریو د اقتصادي ، صنعتي ،سوداګریزو او ترانزیټي همکاریو د زیاتوالي ژمنه وکړه.
